নিয়মীয়া বাৰ্তা ২০ জানুৱাৰীঃ ‘লড়কী হুঁ লৰ সকতী হুঁ’ –উত্তৰ প্রদেশত এই শ্লোগানেৰে কংগ্রেছৰ অভ্যন্তৰত নতুন জোৱাৰৰ সৃষ্টি হৈছিল৷ বিধানসভা নির্বাচনৰ পূর্বে কংগ্রেছে নাৰী শক্তিক জাগ্রত কৰিবলৈ সক্ষম হ’ব বুলি বিভিন্ন মহলে ধাৰণাও কৰিছিল৷ কিন্তু এইবাৰ দল ত্যাগ কৰিবলৈ আগবাঢ়িছে এই কর্মসূচীৰ পোষ্টাৰ গার্ল প্রিয়ংকা মৌর্যই৷ অভিযোগ উঠিছে দলৰ স্বার্থত প্রিয়ংকা মৌর্যৰ পৰিচিতিক ব্যৱহাৰ কৰিছে কংগ্রেছে৷ কিন্তু নির্বাচনত প্রার্থিত্ব প্রদান কৰা নাই৷ এক সূত্রৰ খবৰ অনুসৰি বিজেপিত যোগদান কৰিব পাৰে প্রিয়ংকা গান্ধী ভদ্রাৰ সোঁহাতস্বৰূপ প্রিয়ংকা মৌর্যই৷ যদি সেয়া হয়, তেন্তে উত্তৰ প্রদেশ বিধানসভা নির্বাচনৰ পূর্বে কংগ্রেছ দুর্গত মোক্ষম আঘাত পৰিব৷ উত্তৰ প্রদেশত মহিলা ভোট লাভ কৰিবলৈ কংগ্রেছে যি ব্লুপ্রিণ্ট তৈয়াৰ কৰিছিল সেয়া এতিয়া বিফল হোৱাৰ দিশলৈ গতি কৰা বুলি বিভিন্ন মহলত চর্চা চলিছে৷ লক্ষণীয়ভাৱে ৫ ৰাজ্যৰ বিধানসভা নির্বাচনত কংগ্রেছে ৪০ শতাংশ মহিলা প্রার্থীক প্রক্ষেপ কৰিব বুলি ঘোষণা কৰিছিল৷ কিন্তু দলত সেই প্রতিশ্রুতি এতিয়া অসাৰ হৈ পৰা পৰিলক্ষিত হৈছে৷