গৃহমন্ত্ৰী অমিত শ্বাহে আচানচোলৰ কুলটি অঞ্চলত অনুষ্ঠিত এখন নিৰ্বাচনী সভাত ভাষণ প্ৰদান কৰি সমগ্ৰ পশ্চিম বংগত মহিলাসকলৰ সুৰক্ষাৰ অৱস্থা লৈ তীব্ৰ সমালোচনা কৰে।
তেওঁ ভাষণত কয় যে সমগ্ৰ পশ্চিম বংগত মাতৃ-ভগ্নীসকলৰ সুৰক্ষা নিশ্চিত নহয় আৰু এই বিষয়ত মমতা বেনাৰ্জীক সমালোচনা কৰি কয় যে এগৰাকী মহিলা মুখ্যমন্ত্ৰী হৈ থকাৰ পিছতো সন্দেশখালীত মহিলাসকলৰ ওপৰত অত্যাচাৰ সংঘটিত হৈ আছিল।
তেওঁ আৰু উল্লেখ কৰে যে আৰ জি কৰ মেডিকেল কলেজ, দুৰ্গাপুৰ চৰকাৰী কলেজ আৰু কলকাতা আইন কলেজত মহিলাসকলৰ ওপৰত সংঘটিত অত্যাচাৰৰ ঘটনাই ৰাজ্যখনত মহিলাৰ সুৰক্ষাৰ অৱস্থা স্পষ্ট কৰে।
সভাত তেওঁ এইটোও কয় যে সন্ধিয়া ৭ বজাৰ পিছত মহিলাসকলক ঘৰতে থাকিবলৈ কোৱা মন্তব্যই চৰকাৰৰ ব্যৰ্থতাক প্ৰকাশ কৰে। তেওঁ দাবী কৰে যে বৰ্তমান চৰকাৰৰ সময় এতিয়া সমাপ্তিৰ দিশে আগবাঢ়িছে।
ইফালে কেন্দ্ৰীয় গৃহমন্ত্ৰী অমিত শ্বাহে মঙলবাৰে গোৰ্খা সম্প্ৰদায়ৰ বিৰুদ্ধে তৃণমূল কংগ্ৰেছে চলাই অহা “অন্যায়” সমাপ্ত কৰাৰ সংকল্প গ্ৰহণ কৰে আৰু গোৰ্খালেণ্ড আন্দোলনৰ সৈতে জড়িত লোকসকলৰ বিৰুদ্ধে থকা গোচৰসমূহ প্ৰত্যাহাৰ কৰাৰ প্ৰতিশ্ৰুতি দিয়ে । অমিত শ্বাহে লগতে আশ্বাস দিয়ে যে গোৰ্খাসকলৰ দীৰ্ঘদিনীয়া দাবীসমূহ সমাধানৰ বাবে বিজেপিয়ে এক “স্থায়ী সমাধান” উলিয়াব ।
ডিজিটেল ডেস্ক, ২১ এপ্ৰিল