নিউজ ডেস্ক, ১১ আগষ্ট : পঞ্জাবত বানৰ ফলত ভয়াৱহ দুর্ঘটনা সংঘটিত হৈছে৷ ধাৰাবাহিক বৰষুণত নদীৰ তীৰৱর্তী অঞ্চলসমূহ প্লাৱিত হৈ পৰিছে৷ ইয়াৰ ফলত পানীৰ সোঁতত উটি গ’ল এখন গাড়ী৷ এই ঘটনাত একেটা পৰিয়ালৰ ৭গৰাকী লোকৰ মৃত্যু হৈছে৷ গাড়ীসহ পানীত ডুবি এই লোককেইগৰাকীৰ মৃত্যু হয়৷ লক্ষণীয়ভাৱে এছইউভি গাড়ী এখন পানীয়ে উটুৱাই লৈ যায়৷ ইফালে, গাড়ীখনত থকা অন্য তিনিগৰাকী ব্যক্তিৰ সন্ধান পোৱা নাই উদ্ধাৰকাৰীয়ে৷ স্থানীয় প্রশাসনে সদৰী কৰা অনুসৰি উদ্ধাৰ অভিযান অব্যাহত আছে৷ এই মর্মান্তিক দুর্ঘটনা সংঘটিত হৈছে হোছিয়াৰপুৰৰ পৰা ৩৪ কিলোমিটাৰ নিলগত৷ স্মর্তব্য যে কিছুদিন ধৰি পঞ্জাবত অব্যাহত আছে মুষলধাৰ বৰষুণ৷ ইয়াৰ ফলত সৰু নদীবোৰেও ভয়ংকৰ ৰূপ ধাৰণ কৰিছে৷ প্লাৱিত হৈছে বহু অঞ্চল৷ আৰক্ষী সূত্রই সদৰী কৰা অনুসৰি হিমাচলৰ দেহৰাৰ পৰা মেহৰোৱাল গাঁৱলৈ গাড়ীৰ চালকসহ একেটা পৰিয়ালৰ ১০গৰাকী লোক এছইউভি গাড়ীৰে গৈ থকা সময়তে এই শোকাৱহ দুর্ঘটনাটো সংঘটিত হৈছে৷