নিয়মীয়া বাৰ্তা ডিজিটেল, ১ মাৰ্চঃ নিৰ্বাচন আয়োগে এই মাহতে ঘোষণা কৰিব লোকসভা নিৰ্বাচনৰ তাৰিখ। ইফালে সকলো দলে প্ৰাৰ্থী নিৰ্বাচন আৰম্ভ কৰিছে। আজি বিয়লিৰ ভিতৰত বিজেপিৰ প্ৰথমখন প্ৰাৰ্থী তালিকাও প্ৰকাশ কৰিব। তালিকাত ১০০ৰো অধিক নাম অন্তৰ্ভুক্ত হব। বিজেপিৰ ষ্টালৱাৰ্টক প্ৰথম তালিকাত টিকট দিব পাৰে শাসকীয় দলে। ইয়াৰ ভিতৰত প্ৰধানমন্ত্ৰী নৰেন্দ্ৰ মোদীৰ পৰা আৰম্ভ কৰি প্ৰতিৰক্ষা মন্ত্ৰী ৰাজনাথ সিঙলৈকে সকলোকে অন্তৰ্ভুক্ত হ’ব পাৰে। আচলতে বিজেপিৰ কেন্দ্ৰীয় নিৰ্বাচনী সমিতিৰ বৈঠক চাৰি ঘণ্টা ধৰি চলিছে, তাৰ পিছতে কিছুমান ডাঙৰ আসনৰ বাবে প্ৰাৰ্থীৰ নাম নিৰ্বাচন কৰা হৈছে। প্ৰধানমন্ত্ৰী নৰেন্দ্ৰ মোদীৰ অধ্যক্ষতাত অনুষ্ঠিত হৈছে বিজেপিৰ কেন্দ্ৰীয় নিৰ্বাচন সমিতিৰ বৈঠক। কালি নিশা প্ৰায় ১০.৫০ বজাৰ পৰা আৰম্ভ হোৱা এই সভা পুৱা ৩ বজাৰ পিছত শেষ হয়। এই চাৰি ঘণ্টাত বিজেপিৰ কেন্দ্ৰীয় সমিতিৰ বৈঠকত দেশৰ ভিন্ন আসনৰ আলোচনা কৰা হয়। এই সভাত বিজেপিৰ কেন্দ্ৰীয় নিৰ্বাচন সমিতিয়ে উত্তৰ প্ৰদেশ, তেলেংগানা, পশ্চিমবংগ, ছত্তিশগড়, ৰাজস্থান, মধ্যপ্ৰদেশ, গোৱা, উত্তৰাখণ্ড, গুজৰাট, অসম, ঝাৰখণ্ড, তামিলনাডু, ওড়িশা, মণিপুৰ, দিল্লী, জম্মু-কাশ্মীৰ, পুডুচেৰী আৰু আন্দামান আৰু নিকোবৰৰ আলোচনা কৰা হয়। নিৰ্বাচনী সমিতিৰ বৈঠকৰ পূৰ্বে ত্ৰিপুৰা সন্দৰ্ভতো আলোচনাৰ প্ৰস্তাৱ দিয়া হৈছিল যদিও উত্তৰ-পূব ৰাজ্যখনৰ আসন সন্দৰ্ভত কোনো আলোচনা হোৱা নাছিল। এইদৰে সামগ্ৰিকভাৱে ১৪খন ৰাজ্য আৰু ৪খন কেন্দ্ৰীয় শাসিত অঞ্চলৰ লোকসভাৰ আসনত মন্থন হৈছে। ধাৰণা অনুসৰি বিজেপিয়ে প্ৰকাশ কৰা প্ৰথমখন তালিকাত দলৰ প্ৰবীণ নেতাসকলৰ নাম অন্তৰ্ভুক্ত হ’ব পাৰে। ইয়াত হয়তো প্ৰায়বোৰ কেন্দ্ৰীয় মন্ত্ৰীৰ নাম থাকিব পাৰে। প্ৰথম তালিকাত প্ৰধানমন্ত্ৰী নৰেন্দ্ৰ মোদীক পুনৰ বাৰাণসী আসনৰ পৰা নিৰ্বাচন খেলা দেখা যাব পাৰে। লক্ষ্ণৌৰ পৰা ৰাজনাথ সিং, গান্ধীনগৰৰ পৰা অমিত শ্বাহ, আমেথিৰ পৰা স্মৃতি ইৰাণী, সবলপুৰৰ পৰা ধৰ্মেন্দ্ৰ প্ৰধান, গোৱালিয়াৰৰ পৰা জ্যোতিৰাদিত্য সিন্ধিয়া, বিদিশাৰ পৰা শিৱৰাজ সিং চৌহান, পুৰীৰ পৰা সম্বিত পাত্ৰক টিকট দিব বুলি অনুমান কৰা হৈছে।