বিশেষ বাৰ্তা, ২৭ মেঃ বাই ৱান গেট ৱান থালিৰ অফাৰৰ লোভত পৰি দিল্লীৰ ৪০ বছৰীয়া মহিলা এগৰাকীয়ে অনলাইন এপত ৯০ হাজাৰ টকা হেৰুৱাবলগীয়া হয় ৷ অনলাইন এপ এটা ডাউনলোড কৰি মহিলাগৰাকীয়ে উক্ত অফাৰৰ বাবে ধনৰ লেনদেন কৰাত প্রৱঞ্চক এপটোৱে মহিলাগৰাকীৰ ৯০ হাজাৰ টকা লুটি নিবলৈ সক্ষম হয় ৷ সবিতা শর্মা নামৰ মহিলাগৰাকীয়ে এই সন্দর্ভত চাইবাৰ থানাত এজাহাৰ দাখিল কৰিছে ৷ তথ্য মতে বেংক এটাত কর্মৰত মহিলাগৰাকীয়ে পৰিয়ালৰ লোকৰ পৰা ফেচবুকত ‘সাগৰৰত্ন’ নামৰ জনপ্রিয় ৰেষ্টুৰেণ্ট এখনে বাই ৱান গেট ৱান থালিৰ অফাৰ দিয়াৰ বিষয়ে জানিব পাৰে ৷ ইয়াৰ পিছতে মহিলাগৰাকীয়ে ফেচবুকত থকা ফোন নম্বৰত যোগাযোগ কৰে আৰু এপ এটা ডাউনলোড কৰিবলৈ কয় ৷ সেইমর্মে মহিলাগৰাকীয়ে এপটো ডাউনলোড কৰে ৷ সিপিনৰ পৰা মহিলাগৰাকীক অফাৰটো লাভ কৰিবলৈ হ’লে এপত পঞ্জীয়ন কৰিবলৈ কয় আৰু লিংক এটা দিয়ে ৷ মহিলাগৰাকীয়ে লিংটোত ক্লিক কৰি এপ ডাউনলোড কৰি ইতিপূর্বে তেওঁ দিয়া ইউজাৰ আই ডি আৰু পাছৱার্ড অন্তর্ভুক্ত কৰে ৷ ইয়াৰ পিছতে মহিলাগৰাকীয়ে ম’বাইলটোৰ নিয়ন্ত্রণ হেৰুৱাই পেলায় আৰু লগে লগে বেংকৰ পৰা প্রথমে ৪০ হাজাৰ আৰু কিছু সময় পিছত ৫০ হাজাৰ টকা উঠাই নিয়াৰ বার্তা পায় ৷