এয়াৰ ইণ্ডিয়াৰ বিৰুদ্ধে কঠোৰ DGCA , ৩ বিষয়াক অপসাৰণৰ নিৰ্দেশ
সূত্ৰ অনুসৰি এই তিনিজন বিষয়াক অপাৰেচনেল লেপছৰ বাবে দায়ী বুলি ধৰা পৰিছে আৰু এতিয়া তেওঁলোকক কোনো ক্ৰু মেনেজমেণ্টৰ কামৰ পৰা আঁতৰাই ৰখা হ’ব।
এয়াৰ ইণ্ডিয়াৰ বিৰুদ্ধে কঠোৰ DGCA , ৩ বিষয়াক অপসাৰণৰ নিৰ্দেশ
নিউজ ডেস্ক, ২১ জুনঃ এয়াৰ ইণ্ডিয়াত ক্ৰু শ্বেডুলিং আৰু ৰষ্টাৰিঙৰ সৈতে জড়িত গাফিলতিক গুৰুত্বসহকাৰে লৈ ভাৰতৰ অসামৰিক বিমান পৰিবহণ সঞ্চালকালয়ে (ডিজিচিএ) তিনিজন জ্যেষ্ঠ বিষয়াক আনুষংগিক সকলো দায়িত্বৰ পৰা আঁতৰাই নিবলৈ নিৰ্দেশ দিছে। সূত্ৰ অনুসৰি এই তিনিজন বিষয়াক অপাৰেচনেল লেপছৰ বাবে দায়ী বুলি ধৰা পৰিছে আৰু এতিয়া তেওঁলোকক কোনো ক্ৰু মেনেজমেণ্টৰ কামৰ পৰা আঁতৰাই ৰখা হ’ব।
ডিজিচিএই এয়াৰ ইণ্ডিয়াকো এই বিষয়াসকলৰ বিৰুদ্ধে আভ্যন্তৰীণ অনুশাসনমূলক ব্যৱস্থা শীঘ্ৰে আৰম্ভ কৰিবলৈ আৰু ১০ দিনৰ ভিতৰত সংস্থাটোৰ অগ্ৰগতি আৰু ফলাফলৰ প্ৰতিবেদন দাখিল কৰিবলৈ নিৰ্দেশ দিছে। বিমান সংস্থাটোৰ সুৰক্ষা আৰু পৰিচালনাৰ মানদণ্ডত স্বচ্ছতা আৰু জবাবদিহিতা নিশ্চিত কৰাৰ বাবে এই পদক্ষেপ গ্ৰহণ কৰা হৈছে।
যোৱা ১২ জুনত আহমেদাবাদ বিমানবন্দৰৰ পৰা লণ্ডনলৈ যোৱা এয়াৰ ইণ্ডিয়াৰ বিমান দুৰ্ঘটনাগ্ৰস্ত হোৱাৰ পিছতে অসামৰিক বিমান পৰিবহণ সঞ্চালকালয়ে এই সিদ্ধান্ত গ্ৰহণ কৰিছে। DGCA-ই এয়াৰ ইণ্ডিয়াক নিজৰ সময়সূচী প্ৰক্ৰিয়া উন্নত কৰিবলৈ কয় যাতে ভৱিষ্যতে এনে লেপছ পুনৰ নহয়। DGCA-এ স্পষ্ট কৰি দিছে যে এতিয়া বিমান সুৰক্ষাৰ ক্ষেত্ৰত কোনো আপোচ কৰা নহ’ব।
১২ জুনত সংঘটিত হোৱা এই ভয়ংকৰ বিমান দুৰ্ঘটনাত বিমানখনত থকা ২৪২জন যাত্ৰীৰ ভিতৰত ২৪১জন যাত্ৰীয়ে প্ৰাণ হেৰুৱাইছিল। এই দুৰ্ঘটনা সংঘটিত হয় যেতিয়া বিমানখনে উৰণৰ সময়ত ভাৰসাম্য হেৰুৱাই ওচৰৰ মেডিকেল কলেজৰ ভৱনত খুন্দা মাৰে।
এই ঘটনাত চিকিৎসা মহাবিদ্যালয়ৰ মেছত খাই থকা বহু চিকিৎসকৰো মৃত্যু হয়। এই ভয়াৱহ দুৰ্ঘটনাটোৱে কেৱল ভাৰতকে নহয় সমগ্ৰ বিশ্বকে জোকাৰি গৈছে।