নিয়মীয়া বাৰ্তা ডিজিটেল, ৩১ জানুৱাৰীঃ আগশাৰীৰ ফিনটেক কোম্পানী পেটিএমৰ বিৰুদ্ধে বৃহৎ ব্যৱস্থা গ্ৰহণ কৰা হৈছে। ভাৰতীয় ৰিজাৰ্ভ বেংকে পেটিএম পেমেণ্টছ বেংকক নতুন গ্ৰাহক সংযোজন কৰাত নিষেধাজ্ঞা আৰোপ কৰিছে। এই সিদ্ধান্ত তাৎক্ষণিকভাৱে কাৰ্যকৰী হৈছে। আজি কেন্দ্ৰীয় বেংকে কয় যে বেংকটোৱে বহু নিয়ম উলংঘা কৰিছে। এই কথা প্ৰকাশ পাইছে অডিট ৰিপৰ্টত। এই নিষেধাজ্ঞাৰ পিছত গ্ৰাহকে নিজৰ একাউণ্টত ধন জমা কৰিব নোৱাৰিব। লগতে আৰ বি আইয়ে কয় যে ৱালেট, ফাষ্টটেগ আৰু এন চি এম চি কাৰ্ডতো টপ আপ কৰা নহ’ব। অৱশ্যে গ্ৰাহকক ধন উলিয়াবলৈ অনুমতি দিয়া হৈছে। আৰ বি আইৰ মতে, পেটিএম পেমেণ্টছ বেংকে কোনো গ্ৰাহকৰ পৰা ধন জমা কৰিব নালাগে। ২৯ ফেব্ৰুৱাৰীৰ পিছত কোনো গ্ৰাহকৰ একাউণ্টত কোনো ধৰণৰ জমা ধন গ্ৰহণ কৰা নহ’ব। যদিও এই ধন ৱালেট, ফাষ্টেগ বা আন কোনো প্ৰিপেইড ছিষ্টেমৰ জৰিয়তে লোৱা হয়। ৰিজাৰ্ভ বেংকে কয় যে বহিঃনিৰীক্ষকৰ প্ৰতিবেদনৰ ভিত্তিত এই ব্যৱস্থা গ্ৰহণ কৰা হৈছে। এই প্ৰতিবেদনসমূহে প্ৰকাশ কৰিছিল যে বেংকটোৱে কেইবাটাও বিত্তীয় নিয়ম মানি চলাত ধাৰাবাহিকভাৱে ব্যৰ্থ হৈছে। ইয়াৰ বাহিৰেও বহু ধৰণৰ অনিয়ম পোৱা গৈছিল। পেটিএম পেমেণ্টছ বেংকৰ বিৰুদ্ধে এই অভিযোগৰ তদন্ত অব্যাহত থাকিব। বৰ্তমান কোনো নতুন গ্ৰাহক যোগ নকৰিবলৈ কেন্দ্ৰীয় বেংকে নিৰ্দেশ দিয়ে। লগতে গ্ৰাহকক তেওঁলোকৰ একাউণ্টৰ পৰা ধন উলিয়াবলৈ সম্পূৰ্ণ স্বাধীনতা দিয়া হৈছে। গ্ৰাহকে নিজৰ সঞ্চয়, কাৰেণ্ট, প্ৰিপেইড, ফাষ্টটেগ আৰু নেচনেল কমন মবিলিটি কাৰ্ডৰ পৰা কোনো সমস্যা নোহোৱাকৈ ধন উলিয়াব পাৰিব। যদিও কেন্দ্ৰীয় বেংকে সকলো বেংকিং সেৱা বন্ধ কৰাৰ নিৰ্দেশ দিছে। কিন্তু ধন হস্তান্তৰ কৰাৰ সুবিধা প্ৰদান কৰিব লাগিব। ইয়াৰ ভিতৰত আছে এ ই পি এছ, আই এম পি এছ, বি বি পি অ ইউ আৰু ইউ পি আইৰ সুবিধা। ইয়াৰ উপৰি আৰ বি আইয়ে One97 Communications আৰু Paytm Payments Bank Services Limited ৰ ন’ডেল একাউণ্টসমূহ অতি সোনকালে বন্ধ কৰাৰ নিৰ্দেশ দিছে। লগতে বেংকটোক সকলো লেনদেন আৰু ন’ডেল একাউণ্ট নিষ্পত্তি কৰিবলৈ ১৫ মাৰ্চলৈকে সময় দিয়া হৈছে। ইয়াৰ পিছত কোনো লেনদেন গ্ৰহণ কৰা নহ’ব।