নিয়মীয়া বাৰ্তা, ১১ মাৰ্চঃ ন’ভেল ক’ৰোনা ভাইৰাছ ৰোগৰ সংক্রমণৰ আশংকাক লৈ মাজুলী জিলাত পূর্ণ সতর্কতা অৱলম্বন কৰা হৈছে যদিও দেশী–বিদেশী পর্যটকৰ আগমনৰ ক্ষেত্রত কোনোধৰণৰ বাধা নিষেধ আৰোপ কৰা হোৱা নাই৷ বিষয়টো স্পষ্ট কৰি মাজুলী জিলা প্রশাসনে মঙলবাৰে প্রকাশ কৰে যে ন’ভেল ক’ৰোনা ভাইৰাছ প্রতিৰোধৰ প্রট’কল অনুসৰি মাজুলীত প্রৱেশৰ পূর্বে বিদেশী পর্যটকৰ স্বাস্থ্য পৰীক্ষা (স্ক্রীনিং) নিশ্চিত কৰাৰহে ব্যৱস্থা গ্রহণ কৰিছে প্রশাসনে৷
ন’ভেল ক’ৰোনা ভাইৰাছৰ স্ক্রীনিঙৰ প্রমাণ–পত্র লগত থকা পর্যটকৰ বাবে মাজুলী আগমনত কোনোধৰণৰ প্রতিবন্ধকতা নাই বুলি মাজুলীৰ উপায়ুক্ত বিক্রম কৈৰীয়ে স্পষ্ট কৰি দিয়ে৷ ইফালে, মাজুলী জিলা স্বাস্থ্য বিভাগে ইতিমধ্যে মাজুলীতো ন’ভেল ক’ৰোনা ভাইৰাছৰ স্ক্রীনিঙৰ সম্পূর্ণ ব্যৱস্থা কৰা হৈছে৷