নিয়মীয়া বাৰ্তা, ৬ আগষ্টঃ বৰপেটাৰ আলোপতিচৰ থানাৰ অধীনস্থ নিচানৰ চৰত আজি আবেলি এক ভয়ানক দুৰ্ঘটনা সংঘটিত হয়। তীব্ৰবেগী বাইকৰ খুন্দাত গুৰুতৰভাৱে আহত হয় এটি ৯ বছৰীয়া শিশু। সংকটজনক অৱস্থাত শিশুটিক গুৱাহাটী চিকিসা মহাবিদ্যালয় হাস্পতাল (জি এম চি এইচ)লৈ প্ৰেৰণ কৰা হয়। আঘাতপ্ৰাপ্ত শিশুটি আলোপতিচৰ থানাৰ অন্তৰ্গত নিচানৰচৰ গাঁৱৰ জেহেৰুল ইছলামৰ কন্যা জেচমিনা আহমেদ (৯)। জানিব পৰা মতে আবেলি পৰত শিশুটিয়ে ৰাজপথৰ একাষত থিয় হৈ থকা অৱস্থাত তীব্ৰবেগী ছুপাৰ স্প্লেণ্ডাৰ বাইক এখনে পাছফালৰ পৰা প্ৰচণ্ড জোৰত খুন্দা মৰাত দূৰলৈ ছিটিকি পৰে শিশুটি। মুখমণ্ডল আৰু ভৰিত অতি বেয়াকৈ আঘাত পোৱা শিশুটিক ততালিকে আলোপতিচৰ ক্ষুদ্ৰ প্ৰাথমিক স্বাস্থ্য কেন্দ্ৰলৈ নিয়া হয় যদিও অৱস্থা সংকটজনক দেখি চিকিৎসকে জিএমচিএইচলৈ প্ৰেৰণ কৰে উন্নত চিকিৎসাৰ বাবে। শিশুটিৰ দুভৰিৰ ওপৰেদি বাইকৰ চকা পাৰ হোৱা বুলিও প্ৰত্যক্ষদৰ্শীৰ ভাষ্য একেদৰে কেইবাটাও দাঁত পৰ্যন্ত সুলকি পৰে আৰু অতিমাত্ৰা ৰক্তক্ষৰণ হোৱা বুলিও জানিব পৰা গৈছে। শিশুটিক খুন্দিওৱা বাইকখনৰ নম্বৰ এএছ-১৫ এইচ-৬২০৭। ঘটনাস্থলীত আৰক্ষী উপস্থিত হৈ বাইকখন থানালৈ নিয়াৰ দিহা কৰে।
প্ৰেৰক সঞ্জীৱ কুমাৰ দাস