নিয়মীয়া বাৰ্তা, ১৬ জুলাইঃ বিগত দীর্ঘদিন ওলমি থকা ১,৮২৩ কোটি টকীয়া ডিমা হাছাও পথ প্রকল্পলৈ কেন্দ্রীয় চৰকাৰে অনুমোদন জনাইছে৷ বৃহস্পতিবাৰে এই কথা উল্লেখ কৰিলে মুখ্যমন্ত্রী ড০ হিমন্ত বিশ্ব শর্মাই৷
বিধানসভাত কালি হাফলং সমষ্টিৰ বিধায়িকা নন্দিতা গার্লোছাই এই বিষয়টো উত্থাপন কৰি লোকনির্মাণ বিভাগৰ দায়িত্বত থকা মুখ্যমন্ত্রী ড০ শর্মাৰ দৃষ্টিগোচৰ কৰে৷ ইয়াৰ উত্তৰত মুখ্যমন্ত্রীয়ে কয় যে ৰাষ্ট্রীয় ঘাইপথ প্রাধিকৰণে অসমত টোলপ্লাজা স্থাপন নোহোৱাৰ বাবে নতুন পথৰ বাবে পুঁজি আবণ্টনত অনিহা প্রকাশ কৰিছিল৷ কিন্তু শেহতীয়াকৈ অসমৰ ৰাষ্ট্রীয় ঘাইপথত টোলপ্লাজা স্থাপনৰ পাছতেই ৰাষ্ট্রীয় ঘাইপথ প্রাধিকৰণে ডিমা হাছাও পথ প্রকল্পৰ পুঁজিত অনুমোদন জনাইছে৷ ১,৮২৩ কোটি টকাৰে নির্মাণ হ’ব লগা ৪৯ কিলোমিটাৰ এই পথটোৱে বৰাক উপত্যকাকো যথেষ্ট লাভান্বিত কৰিব৷ লামডিঙৰ পৰা শিলচৰ সংযোগী এই পথটোৰ বাবে অহা ডিচেম্বৰ মাহত নিবিদা আহ্বান কৰা হ’ব৷
মুখ্যমন্ত্রীয়ে ইয়াকো জানিবলৈ দিয়ে যে কেন্দ্রীয় চৰকাৰে অসমৰ ৰাষ্ট্রীয় ঘাইপথত চাৰিখন উৰণীয় সেতু নির্মাণৰ বাবে অনুমোদন জনাইছে৷ ইয়াৰে খানাপাৰাৰ পৰা বিমানবন্দৰলৈ যোৱা ৰাষ্ট্রীয় ঘাইপথত আৰু বাইহাটা চাৰিআলিত দুখন উৰণীয় সেতু নির্মাণ হোৱাৰ বিপৰীতে আন দুটা স্থানত বাকী দুখন নির্মাণ হ’ব৷