মানকাচৰৰ নিউ মাৰ্কেটত কাপোৰৰ দোকানত বিধ্বংসী অগ্নিকাণ্ডঃ দহ লক্ষাধিক টকাৰ কাপোৰ সামগ্ৰী ভস্মীভূত
নিয়মীয়া বাৰ্তা, ২ নৱেম্বৰ : দক্ষিণ শালমাৰা-মানকাচৰ জিলাৰ মানকাচৰ চহৰৰ মাজমজিয়াত থকা নিউ মাৰ্কেটত আজি দিনৰ প্ৰায় ১০ বজাত কাপোৰৰ দোকান এখন বিদ্যুত বিজুতি ঘটি এক বিধ্বংসী অগ্নিকাণ্ডৰ ঘটনা সংঘটিত হৈ দোকানখনৰ সাতটা কোঠালী ভস্মীভূত হৈ প্ৰায় ১০ লক্ষাধিক টকাৰ কাপোৰ সামগ্ৰী নষ্ট হয়।
উল্লেখযোগ্য যে মানকাচৰ থানা এলেকাৰ নিউমাৰ্কেটত থকা প্ৰতিষ্ঠিত এএফ কৰিম গাৰমেণ্টত আজি দিনৰ প্ৰায় ১০ বজাত হঠাত বিদ্যুত বিজুতি ঘটি এক বিধ্বংসী অগ্নিকাণ্ডৰ সুত্ৰপাত হয়। এই অগ্নিকাণ্ডৰ ফলত দোকান খনৰ সন্মুখৰ পৰা আৰম্ভ মুঠ ৭ টা কোঠালীত জুইৰ লেলিহানে আগুৰি ধৰে। লগে লগে ওচৰতে থকা মানকাচৰ অগ্নি নিৰ্বাপক বাহিনী ঘটনাস্থলীত উপস্থিত হৈ জুই নিৰ্বাপন কৰিবলৈ সক্ষম হয় যদিও এই অগ্নিকাণ্ডৰ ফলত প্ৰায় দহ লক্ষাধিক টকাৰ কাপোৰ সামগ্ৰী ভস্মীভূত হৈ ব্যৱসায়ীজনে বৃহৎ লোকচানৰ সম্মুখীন হবলগীয়া হৈছে বুলি ব্যৱসায়ী জানিবলৈ দিছে।