নিয়মীয়া বাৰ্তা, ১৩ জুনঃ পাতিদৰং গাঁৱৰ দুই ঘনিষ্ঠ বন্ধুৰ মৃতদেহ পথাৰৰ পুখুৰীত উদ্ধাৰৰ ২৪ ঘণ্টা নৌহওঁতেই পুনৰ এক গাৰ নোম শিয়ৰি যোৱা ঘটনাই জোকাৰি গৈছে সমগ্র দৰং জিলা৷ দেওমৰনৈৰ কুমাৰপাৰা গাঁৱৰ এটা বাঁহ–খেৰৰ ঘৰত শনিবাৰে পুৱাতে উদ্ধাৰ হয় এহাল পুৰুষ–মহিলাৰ মৃতদেহ৷ গাঁওখনৰ ভগৱান শর্মা নামৰ ৪৩ বছৰীয়া লোকজনৰ সৈতে মেঘালী দেৱী নামৰ বিবাহিত মহিলাগৰাকী একেডাল ৰছীৰে ওলমি থকাৰ বিষয়টো পুৱাতে ৰাষ্ট্র হৈ পৰে৷ লক্ষণীয় যে দেওমৰনৈৰ সমীপৰে কুমাৰপাৰা গাঁৱৰ ভগৱান শর্মা আৰু মেঘালীৰ স্বামী কালীনাথ শর্মাই বিগত বর্ষৰ লকডাউনৰ পূর্বে গুজৰাটৰ এক কোম্পানীত কর্মৰত আছিল৷
লকডাউনৰ বাবে অসমলৈ উভতি আহি পুনৰ গুজৰাট অভিমুখে দুয়ো যাবলৈ সক্ষম নহ’ল৷ বিপৰীতে গাঁৱতে দিন হাজিৰা কৰি জীৱন নির্বাহ কৰি আছিল৷ কিন্তু এইবাৰ আকৌ ক’ভিডৰ বাবে হতাশাগ্রস্ত হৈ পৰে ভগৱান শর্মা৷ আনকি নিজৰ বিধৱা মাতৃসহ দুজনী বৌৱেক, ভতিজাকক কোনো প্রকাৰে সহায় কৰিব নোৱাৰি মেঘালীৰ ঘৰৰ সমীপতে কিছু খেতি–বাতি কৰি থাকিবলৈ লৈছিল৷ গুজৰাটৰ পৰা উভতি অহাৰ পাছত একেবাৰে সহজ–সৰল আৰু অমায়িক হিচাপে পৰিচিত ভগৱান শর্মাৰ দুটা গুৰুতৰ পৰিৱর্তন ৰাইজৰ চকুত পৰে৷ সেই অনুসৰি পুৱাৰে পৰা দোভাগ নিশালৈ আয়–উপার্জন নোহোৱাৰ হতাশাত তেওঁ মদাসক্ত হৈ পৰে৷ তদুপৰি একালত নিজৰ মাতৃৰ দৰে আচৰণ কৰা সতীর্থৰ পত্নী মেঘালীৰ লগত আৰম্ভ হয় অবৈধ সম্পর্ক৷ কালিও দিনৰ ভাগত চুলাই সেৱন কৰি দিনটো ভাত–পানী নোখোৱাকৈ নিজৰ আধা সজা খেৰৰ ঘৰতে আশ্রয় লৈ আছিল যদিও মেঘালীয়েই নিজ ঘৰৰ পৰা ভাত ৰান্ধি আনি দিছিল ভগৱান শর্মাক৷ পাছত গধূলি মেঘালীৰ স্বামী কালীনাথ শর্মাৰ সৈতে সুৰাপান কৰা বুলিও বহুতে জানিবলৈ দিছে৷
কিন্তু নিশা ম’বাইল ফোনযোগে দিয়া মেছেজক লৈ দুয়োটা পৰিয়ালৰ মাজত বিবাদৰ সূত্রপাত হয়৷ মেঘালীৰ স্বামী কালীনাথ শর্মাই সদৰী কৰা মতে, ভগৱান শর্মাই বেয়াকৈ দিয়া এটা মেছেজ জীয়েকে লাভ কৰে আৰু নিশা এই লৈ সংঘাত হয়৷ তেওঁ বিষয়টো বিশেষ নাজানে যদিও নিশা শোৱাপাটীৰ পৰা মেঘালী নিৰুদ্দিষ্ট হয় আৰু শনিবাৰে পুৱা ভগৱান শর্মাই বাঁহৰ ঘৰটোত ওলমি থকা অৱস্থাত দুয়োকে উদ্ধাৰ কৰে৷ পাছত পাথৰিঘাট আৰক্ষী চকীত বিষয়টো অৱগত কৰে আৰু আৰক্ষী–দণ্ডাধীশৰ উপস্থিতিত মৃতদেহ দুটা মৰণোত্তৰ পৰীক্ষাৰ বাবে মঙলদৈ অসামৰিক চিকিৎসালয়লৈ প্রেৰণ কৰে৷
আৰক্ষী, দণ্ডাধীশে দুয়ো প্রেমজনিত কাৰণত এইদৰে মৃত্যুক আঁকোৱালি লোৱা বুলি দাবী কৰে৷ পিছে যি অৱস্থাত দুয়োকে উদ্ধাৰ কৰা হয়, সেই দৃশ্য প্রত্যক্ষ কৰিলে আত্মহত্যাৰ সলনি পৰিকল্পিত হত্যাকাণ্ডৰ আশংকাহে অধিক ঘনীভূত কৰি তুলিছে৷ প্রথমতে দুয়ো যিডাল ৰছীৰে বাঁহৰ ঘৰটোৰ চালৰ ‘ভাৰবাৰী’ত চিপ লৈছিল, তাত উঠিবলৈ ওচৰত নাছিল কোনো চকী বা আন ওখ টুল৷ দূৰৈত বাঁহৰ চাং এখন আছিল যদিও চিপ দিয়া স্থানৰ পৰা ১০/১৫ ফুট দূৰৈৰ পৰা জঁপিয়াই চিপ লোৱা অসম্ভৱ৷ ডিঙিৰ গাঁঠিৰ অৱস্থানৰ ক্ষেত্রত দেখা গৈছে মেঘালীৰ বুকুৰ ওপৰত আছিল এই গাঁঠি৷ পৰিষ্কাৰ কোঠাটোত আত্মহত্যা কৰিলেও ভগৱানৰ ভৰিত দেখা গৈছিল বোকাৰ চাপ৷ গতিকে চিপ দিবলৈ ১০/১২ ফুট বাঁহত কিদৰে বগালে, ভৰিত দেখা বোকামাটিৰ চিহ্ণই প্রাথমিক তদন্ততেই বিষয়টো ৰহস্যজনক কৰি তুলিছে৷ স্বাভাৱিকতে মৰণোত্তৰ পৰীক্ষাৰ প্রতিবেদনেহে নিশ্চিত কৰিব এয়া হত্যা নে আত্মহত্যা৷