নিয়মীয়া বাৰ্তা, ১২ ডিচেম্বৰঃ বিষাক্ত চুলাই পান কৰাৰ ফলত চৰাইদেউ জিলাৰ সোণাৰিৰ নিকটৱর্তী নাফুক দলৈগাঁৱত কৰুণ মৃত্যুক সাবটি ল’ল মহিলাসহ তিনিজনকৈ লোকে৷ তদুপৰি আন কেইবাজনো গুৰুতৰভাৱে অসুস্থ হৈ পৰা বুলি জানিব পৰা গৈছে৷ এই মর্মান্তিক তথা চাঞ্চল্যকৰ ঘটনাৰ বাবে সম্প্রতি গাঁওখনত আতংক সৃষ্টি হৈছে৷ জানিব পৰা মতে, যোৱা আঠ ডিচেম্বৰৰ নিশা গাঁওখনৰ বাসিন্দা মিথুন নায়কৰ পত্নী ৰেণু নায়ক (৩০)ৰ আকস্মিকভাৱে মৃত্যু হয়৷ মহিলাগৰাকীয়ে সেই দিনা সন্ধিয়া চুলাই মদ পান কৰিছিল৷ চুলাই পান কৰাৰ পাছতে তেওঁ হঠাৎ অসুস্থ হৈ পৰে আৰু বিনাচিকিৎসাই মহিলাগৰাকীৰ মৃত্যু হয়৷ আনহাতে, যোৱা ৯ ডিচেম্বৰৰ সন্ধিয়া গাঁওখনৰ দুই ভাতৃৰ অনুৰূপ ধৰণে মৃত্যু হয়৷
প্রাপ্ত তথ্য অনুসৰি, দুই ভাতৃ তালেন নায়ক (৫৫) আৰু তাৰাপ্রসাদ নায়কে (৪৮) উক্ত দিনা সন্ধিয়া চুলাই মদ পান কৰে৷ চুলাই পান কৰাৰ পাছতে সন্ধিয়া প্রায় ৬ বজাত কনিষ্ঠ ভাতৃ তাৰাপ্রসাদ অসুস্থ হৈ পৰে আৰু চিকিৎসকৰ কাষলৈ নিয়াৰ পূর্বেই তেওঁৰ মৃত্যু হয়৷ আনহাতে, নিশা প্রায় আঠ বজাত জ্যেষ্ঠ ভাতৃও হঠাৎ মাটিত ঢ়লি পৰে আৰু লগে লগে তেওঁ শেষ নিশ্বাস ত্যাগ কৰে৷ এই ঘটনাত স্বাভাৱিকতে গাঁওবাসী ভীতিগ্রস্ত হৈ পৰে৷ কালি বিয়লি থুকু ভূমিজ (৪৫) নামৰ লোকজনে পথাৰৰ পৰা ধান আনি থকা অৱস্থাতে হঠাৎ মাটিত ঢ়লি পৰে৷ লগে লগে ভূমিজক সংকটজনক অৱস্থাত চৰাইদেউ অসামৰিক চিকিৎসায়ত ভর্তি কৰোৱা হয়৷ পৰিয়ালৰ সূত্রই জনোৱা মতে, ভূমিজে পথাৰতে চুলাই সেৱন কৰিছিল৷ আনহাতে, গাঁওখনৰ আন কেইবাজনো লোকে চুলাই পান কৰাৰ পাছত অসুস্থ হৈ চিকিৎসাধীন হোৱাৰ পৰিৱর্তে ঘৰতে থকা বুলি এক সূত্রই জনাইছে৷