নিয়মীয়া বাৰ্তা, ১১ এপ্ৰিলঃ আজি বোকাজানত সংঘটিত এক শোকাবহ পথ দুৰ্ঘটনাত এগৰাকী মহিলা থিতাতে নিহত হয়। প্ৰাপ্ত তথ্য অনুসৰি, আজি দিনৰ প্ৰায় দহ বজাত বোকাজানৰ অমৰাজানত ৩৯ নং ৰাষ্ট্ৰীয় ঘাইপথৰ ওপৰত ডিমাপুৰ দিশৰ পৰা গোলাঘাট দিশে গৈ থকা এন এল -০৭-এ – ৬২৪১ নম্বৰৰ মিনি ট্ৰাকখনে মহিলাগৰাকীক মহতীয়াই নিয়াত মহিলাগৰাকী থিতাতে নিহত হয়। নিহত মহিলাগৰাকী দিপালী বিশ্বাস (৫০) বুলি জানিব পৰা গৈছে। ইপিনে, দুৰ্ঘটনা সংঘটিত হোৱাৰ পিছতেই চেগ বুজি গাড়ীখনৰ চালকগৰাকী পলাই যাবলৈ সক্ষম হয় বুলি স্থানীয় ৰাইজে জানিবলৈ দিয়ে। উল্লেখ্য যে, শোকাবহ পথ দুৰ্ঘটনাত নিহত মহিলাগৰাকীয়ে স্বামীসহ এহাল পুত্ৰ-কন্যাক ইহসংহাৰত এৰি যায় বুলি জানিব পৰা গৈছে।