দর্শকৰ উপস্থিতিত হ’ব টকিঅ’ অলিম্পিক

নিয়মীয়া বাৰ্তা, ১৭ জুলাইঃ  মহামাৰী ক’ৰোনা ভাইৰাছৰ ভয়াৱহতাৰ বাবে এবছৰলৈ পিছুৱাই দিয়া টকি’ অলিম্পিকখন সময়মতে অনুষ্ঠিত হ’ব৷– এই মন্তব্য কৰিছে আন্তর্জাতিক অলিম্পিক কমিটীৰ অধ্যক্ষ থমাছ বাকে৷ ২০২১ চনৰ ২৩ জুলাইৰ পৰা ৮ আগষ্টলৈকে অনুষ্ঠিত হ’বলগীয়া বিশ্ব ক্রীড়াৰ সর্ববৃহৎ প্রতিযোগিতাখনত ক’ৰোনা ভাইৰাছৰ কোনো ধৰণৰ প্রভাৱ নপৰে বুলি উল্লেখ কৰি আই’চিৰ অধ্যক্ষগৰাকীয়ে লগতে কয় যে অলিম্পিকখনৰ খেলসমূহ ষ্টেডিয়ামত উপস্থিত থাকি দর্শকসকলে উপভোগ কৰিব পাৰিব৷

ইফালে, অলিম্পিকখনত ভাগ ল’বলগীয়া খেলুৱৈসকলৰ স্বাস্থ্য আৰু জীৱন সুৰক্ষাৰ প্রতি বিশেষ গুৰুত্ব আৰোপ কৰা হৈছে৷ আই’চিৰ এক বৈঠকত অংশগ্রহণ কৰি সাংবাদিকৰে হোৱা বার্তালাপত আন্তর্জাতিক অলিম্পিক কমিটীৰ অধ্যক্ষ থমাছ বাকে কয় যে জাপান চৰকাৰৰ সৈতে লগ লাগি টকিঅ’ অলিম্পিকখন সফল আয়োজন কৰাৰ বাবে কাম কৰি আছোঁ৷ সর্ববৃহৎ প্রতিযোগিতাখনৰ বাবে তৈয়াৰ কৰা সকলো নিয়ম পালন কৰা হ’ব বুলি উল্লেখ কৰি আই’চিৰ অধ্যক্ষগৰাকীয়ে কয় যে অলিম্পিকখনত ভাগ ল’বলগীয়া সকলো লোকৰ সুৰক্ষা প্রদান কৰাটো আমাৰ প্রধান কর্তব্য৷ বিশ্ব স্বাস্থ্য সংগঠনৰ নিয়ম–নীতি পালন কৰি টকিঅ’ অলিম্পিকখন আয়োজন কৰাৰ বাবে আগবাঢ়িছে বুলি উল্লেখ কৰি থমাছ বাকে কয় যে টকিঅ’ অলিম্পিকখন বিনা দর্শকৰ উপস্থিতিত অনুষ্ঠিত হোৱাটো আমি নিবিচাৰোঁ৷