নিয়মীয়া বাৰ্তা ৪ ফেব্রুৱাৰীঃ নিউজিলেণ্ডৰ বিপক্ষে সদ্যসমাপ্ত পাঁচখনীয়া টি–২০ শৃংখলাটোত কৰা চমকপ্রদ প্রদর্শনৰ ফলত ভাৰতীয় দলটোৰ কেইবাজনো খেলুৱৈয়ে সদ্যপ্রকাশিত আই চি চি টি–২০ ৰেংকিঙত স্থানৰ উন্নতি ঘটিবলৈ সক্ষম হৈছে৷ সোমবাৰে প্রকাশ পোৱা ৰেংকিঙৰ বেটছমেন শাখাত ভাৰতৰ উইকেটকীপাৰ বেটছমেন লোকেশ ৰাহুলে দ্বিতীয় স্থানটো অধিকাৰ কৰিবলৈ সক্ষম হৈছে৷ পাঁচখনীয়া টি–২০ মেচৰ শৃংখলাটোত দুর্দান্ত বেটিং প্রদর্শন দাঙি ধৰি ৰাহুলে চাৰিটাকৈ স্থান আগুৱাবলৈ সক্ষম হয়৷ বর্তমান লোকেশ ৰাহুলৰ ৰেটিং পইণ্ট হ’ল ৮২৩৷ ইফালে, বেটছমেন শাখাৰ শীর্ষ ১০ত স্থান লাভ কৰা ভাৰতৰ আনগৰাকী খেলুৱৈ হ’ল তাৰকা অ’পেনাৰ ৰোহিত শর্মা৷ তিনিটা স্থান আগুৱাই ৰোহিতে দশম স্থানটো লাভ কৰাৰ বিপৰীতে টীম ইণ্ডিয়াৰ অধিনায়ক বিৰাট কোহলিয়ে পূর্বৰ নৱম স্থানটো অক্ষুণ্ণ ৰাখিছে৷ আনহাতে ৬৩টা স্থান আগুৱাই শ্রেয়াছ আয়াৰে ৫৫ আৰু ১২টা স্থান আগুৱাই মনীষ পাণ্ডেই ৫৮সংখ্যক স্থানটো লাভ কৰিছে৷