নিউজডেস্ক, ১৮ ডিচেম্বৰঃ চেন্নাইত অপ্রত্যাশিত পৰাজয়ৰ সন্মুখীন হোৱা টীম ইণ্ডিয়াই আজি শক্তিশালী প্রত্যাৱর্তনৰ লক্ষ্যৰে ৱেষ্ট ইণ্ডিজৰ বিৰুদ্ধে দ্বিতীয় এদিনীয়াত অৱতীর্ণ হৈছে ৷
ইতিমধ্যে ১৯ অভাৰত ভাৰতীয় দলটোৰ হৈ প্ৰথম যুটিতে ৯৭ ৰান সংগ্ৰহ কৰিছে টীম ইণ্ডিয়াই । য’ত ভাৰতীয় দলৰ নিৰ্ভৰযোগ্য বেটছমেনদ্বয় ৰোহিত শৰ্মাই অপৰাজিত ৪০ ৰানৰ বিপৰীতে লোকেশ ৰাহুলে ৫৪ ৰানেৰে খেলি আছে ।
বিশাখাপট্টনমত অনুষ্ঠিত হোৱা মেচখনত ভাৰতৰ বাবে জয় অনিবার্য হৈ পৰিছে ৷ কিয়নো, কিৰন পোলার্ড নেতৃত্বাধীন আলহী দলটোৱে প্রথম এদিনীয়াৰ দৰে দ্বিতীয় এদিনীয়াতো অঘটন সৃষ্টিৰে জয় সাব্যস্ত কৰিলে টীম ইণ্ডিয়াই ঘৰৰ মাটিত শৃংখলা হেৰুওৱাটো নিশ্চিত হ’ব ৷ সেয়ে মেচখনক অত্যন্ত গুৰুত্বসহকাৰে লৈছে টীম ইণ্ডিয়াৰ অধিনায়ক বিৰাট কোহলিয়ে ৷
উল্লেখ্য যে চেন্নাইৰ প্রথম এদিনীয়াত ভাৰতৰ বলিং আক্রমণৰ দুর্বলতাৰ সুযোগ লৈ ৱেষ্ট ইণ্ডিজৰ দুই উদীয়মান তাৰকা ছিমৰন হেটমায়াৰ আৰু ছাই হ’প দুর্দান্ত শতকেৰে উজলি উঠিছিল ৷