নিয়মীয়া বাৰ্তা ২৯ অক্টোবৰঃ মহামাৰী ক’ৰোনা ভাইৰাছৰ পৰা মুক্তি পোৱা নাই বিশ্ব ফুটবলৰ অন্যতম শ্রেষ্ঠ ষ্ট্রাইকাৰ ক্রিষ্টিয়ানো ৰ’নাল্ডোৱে৷ বার্চিলোনাৰ বিৰুদ্ধে খেলিবলগীয়া চেম্পিয়নছ লীগৰ গুৰুত্বপূর্ণ মেচৰ পূর্বে জুভেণ্টাছৰ তাৰকাগৰাকীৰ শৰীৰত পুনৰ ক’ৰোনা ভাইৰাছৰ উপস্থিতি ধৰা পৰিছে৷ ইটালী আৰু পর্তুগালৰ সংবাদ মাধ্যমত প্রকাশ পোৱা বাতৰি অনুসৰি মেচৰ ২৪ ঘণ্টা পূর্বে আন খেলুৱৈৰ লগতে ৰ’নাল্ডোৰো ক’ভিড টেষ্ট সম্পন্ন হয় আৰু এই টেষ্টত তাৰকাগৰাকীৰ ফলাফল পজিটিভ পোৱা গৈছে৷ উল্লেখ্য যে দুসপ্তাহ পূর্বে নেচনছ লীগত পর্তুগালৰ হৈ খেলি থকা সময়ত তেওঁৰ শৰীৰত প্রথমবাৰৰ বাবে ক’ভিড–১৯ৰ উপস্থিতি ধৰা পৰিছিল৷ তেতিয়াৰে পৰা ৰ’নাল্ডোৰ টেষ্টৰ ফলাফল মুঠ ১৮বাৰ পজিটিভ পোৱা গৈছে বুলি ইটালীৰ সংবাদ মাধ্যমে দাবী কৰিছে৷ উৱেফাৰ নিয়ম অনুসৰি খেলাৰ অনুমতি লাভ কৰিবলৈ মেচৰ ২৪ ঘণ্টা পূর্বে ৰ’নাল্ডোৰ ক’ৰোনা টেষ্ট নিগেটিভ আহিব লাগিব৷ ক’ৰোনাৰ পৰা মুক্তি নোপোৱাৰ বাবে ছুপাৰ ষ্টাৰগৰাকীয়ে ইতিমধ্যে চেম্পিয়নছ লীগৰ তিনিখন মেচত অংশ ল’ব পৰা নাই৷