নিয়মীয়া বাৰ্তা ডিজিটেল, ৯ জানুৱাৰীঃ টীম ইণ্ডিয়াৰ তাৰকা পেচবলাৰ যশপ্রীত বুমৰাহে আইচিচি টেষ্ট ৰেংকিঙৰ বলিং শাখাৰ শীর্ষস্থানটো অক্ষুণ্ণ ৰাখিছে৷ সদ্যপ্রকাশিত টেষ্ট ৰেংকিঙৰ বলিং শাখাত ৯০৮ ৰেটিং পইণ্টেৰে বুমৰাহে শীর্ষস্থানটো নিজৰ দখলতে ৰাখে৷ ইফালে অষ্ট্রেলিয়াৰ তাৰকা পেচবলাৰ পেট কামিনছে দ্বিতীয় স্থানটো দখল কৰাৰ বিপৰীতে দক্ষিণ আফ্রিকাৰ পেচবলাৰ কাগিছো ৰাবাডাই তৃতীয় স্থানটো দখল কৰিছে৷ ইফালে সদ্যসমাপ্ত ব’ৰ্ডাৰ–গাভাস্কাৰ ট্রফী টেষ্ট শৃংখলাৰ ছিডনীত অনুষ্ঠিত পঞ্চম তথা অন্তিমখন টেষ্টত ১০টা উইকেট লোৱাৰ সুবাদত অষ্ট্রেলিয়াৰ স্ক’ট বলাণ্ডে ২৯টা স্থান আগুৱাই নৱম স্থানটো দখল কৰিবলৈ সক্ষম হৈছে৷ ইফালে ইংলেণ্ডৰ জ’ ৰুটে শীর্ষস্থান দখল কৰি থকা বেটিং শাখাত ভাৰতৰ উইকেটকীপাৰ–বেটাৰ ঋষভ পণ্টে তিনিটা স্থান আগুৱাবলৈ সক্ষম হৈছে৷ ছিডনী টেষ্টত দাঙি ধৰা উন্নত প্রদর্শনৰ বাবে পণ্টে নৱম স্থানলৈ উন্নীত হয়৷ টীম ইণ্ডিয়াৰ তাৰকা অ’পেনাৰ যশস্বী জয়ছোৱালে চতুর্থ স্থানটো অক্ষুণ্ণ ৰাখিছে৷ বেটিং শাখাত ইংলেণ্ডৰ হেৰী ব্রুকে দ্বিতীয় আৰু নিউজিলেণ্ডৰ কেন উইলিয়ামছনে তৃতীয় স্থানটো অধিকাৰ কৰি আছে৷ আনহাতে টীম ইণ্ডিয়াৰ ৰবীন্দ্র জাদেজাই অলৰাউণ্ড শাখাৰ শীর্ষ স্থানটো নিজৰ দখলতে ৰাখিছে৷