নিয়মীয়া বাৰ্তা, ৫ অক্টোবৰঃ চমকপ্রদ প্রদর্শনেৰে আই পি এলত সুন্দৰ আৰম্ভণি ঘটোৱা ৰয়েল চেলেঞ্জার্ছ বাংগালুৰু আৰু দিল্লী কেপিটেলছ আজি পৰস্পৰৰ সন্মুখীন হ’ব৷ ডুবাই আন্তঃৰাষ্ট্রীয় ক্রিকেট ষ্টেডিয়ামত অনুষ্ঠিত হ’বলগীয়া মেচখনত দুয়োটা দলে চতুর্থ জয়ৰ লক্ষ্যৰে খেলপথাৰত নামিব৷
উল্লেখ্য যে আৰ চি বি আৰু দিল্লী কেপিটেলছে এতিয়ালৈকে ৪খন মেচৰ তিনিখনতে জয় সাব্যস্ত কৰি আই পি এলৰ পইণ্ট তালিকাৰ প্রথম দুটা স্থান অধিকাৰ কৰি আছে৷ যোৱানিশা দিল্লী কেপিটেলছে কলকাতা নাইট ৰাইডার্ছক ১৮ ৰানত পৰাস্ত কৰি পইণ্ট তালিকাৰ শীর্ষলৈ উন্নীত হৈছে৷ একেদৰে কালি দিনৰ ভাগত অনুষ্ঠিত মেচত বিৰাট কোহিল নেতৃত্বাধীন আৰ চি বিয়ে ৰাজস্থান ৰয়েলছক ৮ উইকেটত পৰাস্ত কৰি চলিত আই পি এলত তৃতীয় বিজয় সাব্যস্ত কৰিছে৷ অধিনায়ক কোহলি দিনটোৰ প্রথমখন মেচত যিদৰে দায়িত্বপূর্ণ অর্ধশতকেৰে (৭২ ৰান) ফর্মলৈ উভতি আহে, ঠিক একেদৰে দিল্লী কেপিটেলছৰ অধিনায়ক আয়াৰে দিনটোৰ দ্বিতীয়খন মেচত ৮৮ ৰানৰ বিস্ফোৰক ইনিংছ খেলি দিল্লীৰ জয়ত মুখ্য ভূমিকা গ্রহণ কৰে৷
ইফালে অ’পেনাৰ পৃথ্বি শ্ব আৰু বিস্ফোৰক বেটছমেন ঋষভ পণ্টৰ সুন্দৰ ফর্মে দিল্লী কেপিটেলছৰ আত্মবিশ্বাস বৃদ্ধি কৰিছে৷ বলিঙত কাগিছো ৰাবাডা, এনৰিচ নর্টজে আৰু মার্কাছ ষ্টইনিছে প্রতিখন মেচতে প্রতিপক্ষৰ বেটছমেনক নিয়ন্ত্রণত ৰাখিবলৈ সক্ষম হৈছে৷ আনহাতে, ৰয়েল চেলেঞ্জার্ছ বাংগালুৰুক উদীয়মান অ’পেনাৰ দেৱদূত পাড়িকাল, আৰন ফিন্স, এবি ডি ভিলিয়ার্ছ আৰু কোহলিৰ ফর্মে অধিক শক্তিশালী কৰি তুলিছে৷ বলিঙত তাৰকা স্পিনাৰ য়ুজৱেন্দ্র চাহাল আৰু বেগী বলাৰ নৱদ্বীপ ছাইনীয়ে অধিনায়ক কোহলিৰ প্রত্যাশা পূৰণ কৰিবলৈ সক্ষম হৈছে৷ দুয়োটা দলে প্রতিযোগিতাখনত দুর্দান্ত প্রদর্শন আগবঢ়াই থকাৰ প্রতি লক্ষ্য ৰাখি কাইলৈৰ মেচখন হাই ভল্টেজ হোৱাৰ পূর্ণ সম্ভাৱনা আছে৷
খেলৰ সময়ঃ সন্ধিয়া ৭.৩০ বজা৷