নিয়মীয়া বাৰ্তা ১১ জানুৱাৰীঃ ভাৰত আৰু দক্ষিণ আফ্রিকাৰ মাজত চলিত টেষ্ট শৃংখলাৰ তৃতীয় তথা নির্ণায়ক মেচখন আজিৰে পৰা আৰম্ভ হ’ব৷ কেপটাউনৰ নিউলেণ্ডছ ষ্টেডিয়ামত অনুষ্ঠিত হ’বলগীয়া মেচখনত জয়েৰে আলহী দলটোৱে ইতিহাস সৃষ্টিৰ সুৱর্ণ সুযোগ লাভ কৰিছে৷ উল্লেখ্য যে ভাৰতে নিউজিলেণ্ডজৰ মাটিত এতিয়ালৈকে টেষ্ট শৃংখলা জয়ৰ সোৱাদ লাভ কৰা নাই৷ প্রথম টেষ্টত চমকপ্রদ জয়েৰে কোহলি বাহিনীয়ে শৃংখলাত সুন্দৰ আৰম্ভণি কৰে যদিও অধিনায়ক কোহলিৰ অনুপস্থিতিত দ্বিতীয় টেষ্টত টীম ইণ্ডিয়া পৰাস্ত হোৱাত দক্ষিণ আফ্রিকাই শৃংখলাত সমতা স্থাপন কৰিবলৈ সক্ষম হয়৷ সেয়ে কাইলৈৰ পৰা আৰম্ভ হ’বলগীয়া মেচখন দুয়োটা দলৰ বাবে মৰণপণ যুঁজ সদৃশ হৈ পৰিছে৷ গুৰুত্বপূর্ণ নির্ণায়ক টেষ্টত তাৰকাগৰাকীৰ প্রত্যাৱর্তনে আলহী দলটোৰ আত্মবিশ্বাস বৃদ্ধি কৰিব৷ কোহলিৰ আগমনত কাইলৈ হনুমা বিহাৰীয়ে স্থান হেৰুওৱাটো এক প্রকাৰ নিশ্চিত৷ দুই অভিজ্ঞ বেটছমেন আজিংক্য ৰাহানে আৰু শ্বেটেশ্বৰ পূজাৰাই দীর্ঘদিন ধৰি দুর্বল ফর্মত ভুগি আছিল যদিও দ্বিতীয় টেষ্টৰ দ্বিতীয় ইনিংছত অর্ধশতক অর্জন কৰি তেওঁলোকে মূল একাদশত একপ্রকাৰ স্থান নিশ্চিত কৰিবলৈ সক্ষম হৈছে৷
মায়ংক আগৰৱাল আৰু লোকেশ ৰাহুলে এই শৃংখলাটোত টীম ইণ্ডিয়াক সুন্দৰ আৰম্ভণি দিয়াটো দলটোৰ বাবে শুভ লক্ষণ হিচাপে বিবেচিত হৈছে৷ অধিনায়ক কোহলিয়ে দক্ষিণ আফ্রিকাৰ বিৰুদ্ধে এই গুৰুত্বপূর্ণ মেচখনত দীঘলীয়া ইনিংছ খেলাৰ লক্ষ্যৰে খেলপথাৰত নামিব৷ দুবছৰ ধৰি শতকৰ মুখ নেদেখা তাৰকাগৰাকীয়ে কাইলৈ কেৰিয়াৰৰ ৯৯সংখ্যক টেষ্টত দেশক প্রতিনিধিত্ব কৰিব৷ দুর্বল শ্বট খেলি আউট হোৱাৰ বাবে সততে সমালোচনাৰ সন্মুখীন হোৱা উইকেটৰক্ষক বেটছমেন ঋষভ পণ্টৰ প্রদর্শনৰ ওপৰতো ক্রিকেটপ্রেমীৰ দৃষ্টি নিবদ্ধ থাকিব৷
ইফালে, আঘাতৰ বাবে তৃতীয় টেষ্টৰ পৰা মহম্মদ ছিৰাজ বাহিৰ হোৱাত ভাৰতীয় বলিং আক্রমণত কিছু সালসলনি ঘটাটো নিশ্চিত৷ ঈশান্ত শর্মা অথবা উমেশ যাদৱে মূল একাদশত সুযোগ পাব৷ আনহাতে, দ্বিতীয় টেষ্টত দুর্দান্ত যুঁজ দি জয় সাব্যস্ত কৰাৰ পিছত ঘৰুৱা দল দক্ষিণ আফ্রিকা আত্মবিশ্বাসী হৈ আছে৷ ডীন এলগাৰ নেতৃত্বাধীন দলটোৱে তৃতীয় টেষ্টতো ভাৰতক বিপদত পেলাই শৃংখলা জয়ৰ লক্ষ্য লৈছে৷ কাগিছো ৰাবাডা, লুংগী এনগিৰি, ডোৱান অলিভাৰ আদিৰ দৰে দুর্ধর্ষ বেগী বলাৰেৰে সমৃদ্ধ দক্ষিণ আফ্রিকাই ভাৰতৰ তাৰকাসমৃদ্ধ বেটিং বিভাগক যিকোনো মুহূর্তত শ’লঠেকত পেলাব পাৰে৷ উল্লেখ্য যে কেপটাউনৰ নিউলেণ্ডছ ষ্টেডিয়ামত ভাৰতে এতিয়ালৈকে খেলা পাঁচখন মেচৰ এখনতো জয়ৰ মুখ দেখা নাই৷ তিনিখনত পৰাস্ত হোৱা দলটোৱে দুখন মেচত ড্র খেলিছে৷ খেলৰ সময় ঃ দিনৰ ২ বজা৷