নিয়মীয়া বাৰ্তা, ২৩ ডিচেম্বৰ: ইণ্ডিয়ান প্ৰিমিয়াৰ লীগ (আই পি এল) ২০২৩ৰ নিলামত ইংলেণ্ডৰ তাৰকা অল ৰাউণ্ডাৰ ছেম কাৰানক পঞ্জাব কিংছে ১৮.৫০ কোটি টকাত ক্ৰয় কৰিছে। আঘাতৰ বাবে কাৰানে লীগৰ শেষ ছিজনত অংশ ল’ব নোৱাৰিলে যদিও এই ছিজনত তেওঁৰ পুনৰ উভতি অহাৰ সম্ভাৱনা আছে। কাৰানক কিনিবলৈ তেওঁৰ পুৰণি দল দুটা পঞ্জাব কিংছ আৰু চেন্নাই ছুপাৰ কিংছৰ মাজত দীঘলীয়া ক্ৰয়-বিক্ৰয় হৈছিল, য’ত পঞ্জাবে জয়লাভ কৰিছিল। ইয়াৰ লগতে কাৰান এই লীগৰ সৰ্বাধিক বিক্ৰী হোৱা খেলুৱৈ হিচাপেও পৰিগণিত হৈছে।
আই পি এলত ৩২খন মেচ খেলা ছেম কাৰানে ২৩ ইনিংছত ২২.৪৭ গড়ে ৩৩৭ ৰান সংগ্ৰহ কৰিছে। আই পি এলত কাৰানৰ নামত দুটা ফিফটি আছে, আনহাতে বলিংত তেওঁ ৩১ ইনিংছত ৩১.০৯ গড়ে ৩২টা উইকেট দখল কৰিছে। লীগৰ প্ৰথম ছিজনত পাঞ্জাব কিংছৰ হৈ খেলি থকাৰ সময়তে কাৰানে হেট্ৰিক অৰ্জন কৰিছিল। তেওঁ হেট্ৰিক অৰ্জন কৰা আটাইতকৈ কম বয়সীয়া খেলুৱৈ।