বিশেষ বাৰ্তা, ১২ অক্টোবৰঃ দুবছৰ অপেক্ষাৰ অন্তত গুৱাহাটীলৈ পুনৰ উভতি আহিছে হিৰো ইণ্ডিয়ান ছুপাৰ লীগ (আইএছএল)ৰ ৰোমাঞ্চ৷ নৱম সংস্কৰণৰ কাইলৈ সৰুসজাই ক্রীড়া প্রকল্পৰ ইন্দিৰা গান্ধী এথলেটিকছ ষ্টেডিয়ামত হ’ব লগা মেচখনত ঘৰুৱা দল নর্থ ইষ্ট ইউনাইটেডে মুখামুখি হ’ব বিগত বর্ষৰ চেম্পিয়ন হায়দৰাবাদ এফচিৰ৷ লীগত উভয় দলৰে এয়া দ্বিতীয় মেচ৷ কাইলৈ গুৱাহাটীৰ নর্থ ইষ্ট ইউনাইটেডে নিজৰ ৫০সংখ্যক মেচখন খেলিব আৰু এই গৌৰৱময় ক্ষণত দলে সমর্থকক জয়েৰে আনন্দ দিয়াৰ আশা ব্যক্ত কৰিছে৷ কিন্তু ঘৰুৱা দলৰ বাবে এয়া একেবাৰে সহজ নহ’ব৷ কাৰণ যোৱা পাঁচখন মেচত হায়দৰাবাদক কোনো দলে পৰাস্ত কৰিবলৈ সক্ষম হোৱা নাই৷ ইফালে আইএছএলৰ লগতে দুবছৰৰ পাছত গুৱাহাটীলৈ খেলিব আহিছে অসমৰ হলিচৰণ নার্জাৰীও৷ কিন্তু ঘৰুৱা দলৰ হৈ নহয়৷ হায়দৰাবাদৰ তাৰকা ষ্ট্রাইকাৰ হৈ৷ উল্লেখ্য যে আইএছএলত নর্থ ইষ্ট আৰু হায়দৰাবাদে ছবাৰকৈ মুখামুখি হৈছে আৰু ইয়াৰে চাৰিখনত হায়দৰাবাদে আৰু এখনত নর্থ ইষ্টে জয়লাভ কৰিছে৷
খেলৰ সময় : সন্ধিয়া ৭.৩০ বজা