নিয়মীয়া বাৰ্তা ডিজিটেল, ১০ জানুৱাৰীঃ ক্রমাগত তিনিখন মেচত অপৰাজেয় হৈ থকা নর্থ–ইষ্ট ইউনাইটেড এফচিয়ে চলিত আইএছএলৰ আজি গুৱাহাটীৰ ইন্দিৰা গান্ধী এথলেটিক ষ্টেডিয়ামত পঞ্জাব এফচিৰ বিৰুদ্ধে নিজৰ পঞ্চদশ মেচখন খেলিব৷ উল্লেখ্য যে পঞ্জাব এফচিয়ে একেৰাহে চাৰিখন মেচত পৰাস্ত হৈ গুৱাহাটীলৈ আহিছে৷ স্বাভাৱিকতে আত্মবিশ্বাসী ঘৰুৱা দলটোৰ বিৰুদ্ধে চাপত থাকিব পঞ্জাব৷ নর্থ–ইষ্ট ইউনাইটেডে ১৪খন খেলত ২২ পইণ্ট লাভ কৰি তালিকাৰ ষষ্ঠ স্থানত আছে৷ ইফালে, ছিজনত সুন্দৰ আৰম্ভণি কৰা পঞ্জাব দলে ১৩খন খেলত ১৮ পইণ্ট লাভ কৰি অষ্টম স্থানত আছে৷ নর্থ–ইষ্ট ইউনাইটেড আৰু পঞ্জাব এফচি এতিয়ালৈকে তিনিবাৰকৈ মুখামুখি হৈছে৷ ইয়াৰে এখন খেল ড্র হোৱাৰ বিপৰীতে উভয় দলে এখনকৈ মেচত জয়লাভ কৰিছে৷ ক্লীনশ্বীট ৰাখিব পাৰিলে আইএছএলত ক্রমাগত তিনিখনত এই ফলাফল প্রথমবাৰৰ বাবে পাব নর্থ–ইষ্ট ইউনাইটেডে৷ আজিৰ মেচক লৈ নর্থ–ইষ্ট ইউনাইটেডৰ মুখ্য প্রশিক্ষক জুৱান পেড্র’ বেনালিয়ে কয় ‘আমি আগতীয়াকৈ শক্তিশালী ফিনিচিং প্রবৃত্তি গ্রহণ কৰাটো প্রয়োজন৷ আমাৰ সমস্যাটো হ’ল কেতিয়াবা আমি আগুৱাই যাবলৈ পাহৰি যাওঁ৷ এয়া মূল সমস্যা৷ আমি আগবাঢ়ি যাবলৈ শিকিব লাগিব৷ অৱশ্যে আমি বহুত ভাল খেলি আছোঁ৷’ ইফালে, পঞ্জাবৰ মুখ্য প্রশিক্ষক পানাজি’টিছ ডিলম্পেৰিছে স্বীকাৰ কৰে যে দলৰ শেহতীয়া ফলাফলৰ পিছত এতিয়া উন্নতিৰ প্রয়োজন৷ ‘যেতিয়া এটা দলে ফলাফল নাপায়, তেতিয়া ইয়াৰ কাৰণ হ’ল আমি আমাৰ গেমপ্লেনৰ কিছু অংশ বিকশিত কৰিব লাগিব৷ অজুহাতৰ পৰিৱর্তে নিজকে উন্নত কৰিব লাগিব৷’ ডিলম্পেৰিছে কয়৷
খেলৰ সময়ঃ নিশা ৭.৩০ বজা৷