নিয়মীয়া বাৰ্তা ডিজিটেল, ১৪ ফেব্ৰুৱাৰীঃ অষ্ট্রেলিয়াৰ বিৰুদ্ধে টেষ্ট শৃংখলাত পৰাজিত হোৱাৰ পিছতে কঠোৰ নির্দেশনা আৰম্ভ কৰাৰ সিদ্ধান্ত লৈছিল ভাৰতীয় ক্রিকেট ব’র্ডে৷ চেম্পিয়নছ ট্রফীৰ পৰাই আৰম্ভ হ’ব ব’ৰ্ডৰ নতুন ফটোৱা৷ ডুবাইলৈ ক্রিকেটাৰসকলৰ সৈতে যাব নোৱাৰিব তেওঁলোকৰ পৰিয়াল৷ দলৰ বাবে কেইবাজনো ৰান্ধনি লগত নিয়াৰ অনুমতি দিব পাৰে ব’র্ডে৷ কোনো ক্রিকেটাৰে বা সহায়ক ষ্টাফৰ সৈতে তেওঁৰ ব্যক্তিগত সহায়ক গ’লে তেওঁলোক আন হোটেলত থাকিব লাগিব৷ উল্লেখ্য যে ২০ ফেব্রুৱাৰীত ডুবাইত বাংলাদেশৰ বিৰুদ্ধে মেচেৰে অভিযান আৰম্ভ কৰিব ভাৰতে৷ দলটোৱে ফাইনেল খেলিলেও প্রতিযোগিতাখন তিনিসপ্তাহৰ ভিতৰত সমাপ্ত হ’ব৷ ব’ডৰ এক নির্দেশনাত কোৱা হৈছে যে যদি ৪৫ দিন বা তাতকৈ অধিক দিন দল বিদেশ ভ্রমণত থাকে তেনেহ’লে দুসপ্তাহৰ বাবে পৰিয়ালৰ সদস্য ক্রিকেটাৰসকলৰ সৈতে থাকিব পাৰিব৷ এই ক্ষেত্রত যিহেতু প্রতিযোগিতাৰ দিন যথেষ্ট কম, সেয়ে লগত পৰিয়াল নিব নোৱাৰিব ক্রিকেটাৰসকলে৷ নির্দেশনা অনুসৰি, কোনোৱে পৰিয়াল নিব বিচাৰিলে অধিনায়ক, প্রশিক্ষক আৰু ব’ডৰ অনুমতি ল’ব লাগিব৷ যদি বিশেষ কাৰণত কাৰোবাক অনুমতি দিয়া হয়, তেনেহ’লে পৰিয়ালৰ যাতায়াত, থকা–খোৱাৰ খৰচ ক্রিকেটাৰসকলে নিজে কৰিব লাগিব৷ উল্লেখ্য যে অহা জুন–জুলাই–আগষ্টত ইংলেণ্ডৰ বিৰুদ্ধে পাঁচখন টেষ্টৰ শৃংখলা খেলিবলৈ যাব৷ সেই শৃংখলাত দুসপ্তাহৰ বাবে তেওঁলোকৰ পৰিয়াল লগত ৰাখিব পাৰিব৷ কিন্তু চেম্পিয়নছ ট্রফীত ব’ডৰ নতুন নিয়ম মানিবই লাগিব বুলি নির্দেশনাটোত কোৱা হৈছে৷