নিয়মীয়া বার্তা, ১৮ ডিচেম্বৰঃ মহামাৰী ক’ভিড–১৯ৰ প্রাদুর্ভাৱৰ পিছত ভাৰতীয় ক্রিকেট নিয়ন্ত্রণ ব’র্ডে চৈয়দ মুস্তাক আলী টি–২০ ক্রিকেট প্রতিযোগিতাৰে দেশৰ ঘৰুৱা ক্রিকেট প্রতিযোগিতা আৰম্ভ কৰিব৷ অহা ১০–৩১ জানুৱাৰীত দেশৰ ৬টা স্থানত প্রতিযোগিতাখন অনুষ্ঠিত হ’ব৷ বি চি চি আইৰ সচিব জয় শ্বাহে ৰাজ্যিক ক্রিকেট সন্থাসমূহক এই কথা জানিবলৈ দিছে৷ ৩৮টা দলে মুঠ ৫টা গ্রুপত খেলিবলগীয়া টি–২০ প্রতিযোগিতাখন আয়োজনৰ দায়িত্ব লাভ কৰা স্থানসমূহ হ’ল বাংগালুৰু, কলকাতা, বৰোদা, ইন্দোৰ, মুম্বাই আৰু চেন্নাই৷ বাংগালুৰুত এ গ্রুপ, কলকাতাত বি গ্রুপ, বৰোদাত চি গ্রুপ, ইন্দোৰত ডি গ্রুপ, মুম্বাইত ই গ্রুপ আৰু চেন্নাইত প্লেট গ্রুপৰ মেচসমূহ খেলোৱা হ’ব৷
উল্লেখ্য যে অসমে প্রতিযোগিতাখনৰ বি গ্রুপত স্থান লাভ কৰিছে৷ এই গ্রুপত অসমৰ সৈতে থকা দলসমূহ হ’ল– ওড়িশা, বংগ, ঝাৰখণ্ড, তামিলনাডু আৰু হায়দৰাবাদ৷ অসমে ১০ জানুৱাৰীত হায়দৰাবাদৰ বিৰুদ্ধে মুস্তাক আলী টি–২০ৰ প্রথমখন মেচ খেলিব৷ ইয়াৰ পিছতে দলটোৱে ১২ জানুৱাৰীত তামিলনাডু, ১৪ জানুৱাৰীত ঝাৰখণ্ড, ১৬ জানুৱাৰীত বংগ আৰু ১৮ জানুৱাৰীত ওড়িশাৰ মুখামুখি হ’ব৷ প্রতিযোগিতাৰ নকআউট ৰাউণ্ডৰ মেচসমূহ আহমেদাবাদৰ নৱনির্মিত মটেৰা ষ্টেডিয়ামত অনুষ্ঠিত হ’ব৷