নিয়মীয়া বাৰ্তা ডিজিটেল, ২৮ ডিচেম্বৰঃ মেলবৰ্ন টেষ্টত নিজৰ টেষ্ট কেৰিয়াৰৰ প্ৰথমটো শতক অৰ্জন কৰিলে নীতিশ কুমাৰ ৰেড্ডীয়ে। নীতিশৰ এই শতকটো এনে এটা সময়ত আহিছিল যেতিয়া টীম ইণ্ডিয়াই ফ’ল’অনৰ পৰা আঁতৰি থাকিবলৈ সংগ্ৰাম কৰি আছিল। এই উজ্জ্বল ইনিংছত তেওঁ ১৭২টা বলত শতক অৰ্জন কৰি ১০টা চাৰি আৰু এটা ছয় কৰে। নীতিশ ৰেড্ডী এতিয়া অষ্ট্ৰেলিয়াত শতক অৰ্জন কৰা তৃতীয় কনিষ্ঠ ভাৰতীয় ক্ৰিকেটাৰ হিচাপে পৰিগণিত হৈছে। ২১ বছৰ ২১৬ দিন বয়সত এই কৃতিত্ব অৰ্জন কৰিছে নীতিশে। অষ্ট্ৰেলিয়াত নীতিশ ৰেড্ডীতকৈ কম বয়সতে শতক অৰ্জন কৰা একমাত্ৰ ভাৰতীয় খেলুৱৈ শচীন টেণ্ডুলকাৰ আৰু ঋষভ পণ্ট। ১৯৯২ চনৰ জানুৱাৰী মাহত, ১৮ বছৰ ২৫৩ দিন বয়সত ছিডনীত খেলি থকাৰ সময়তে শচীনে অষ্ট্ৰেলিয়াৰ মাটিত শতক অৰ্জন কৰিছিল। মাত্ৰ ৩০ দিনৰ পাছত পাৰ্থত খেলি থকা অৱস্থাত শচীনে আৰু এটা শতক অৰ্জন কৰে। আনহাতে ঋষভ পণ্টে ২০১৯ চনত ছিডনীত মাত্ৰ ২১ বছৰ ৯২ দিন বয়সতে শতক অৰ্জন কৰিছিল। তেওঁৰ পিছত এই তালিকাত যোগ হ’ব নীতিশ ৰেড্ডীৰ নাম। ইয়াৰ লগে লগে নীতিশ ৰেড্ডীয়ে অষ্টম নম্বৰত বেটিং কৰি শতক অৰ্জন কৰা নিৰ্বাচিত খেলুৱৈৰ দলটোত যোগদান কৰিছে। ঐতিহাসিক কেৰিয়াৰত ৮ নম্বৰ স্থানত খেলি ভাৰতৰ হৈ মুঠ ৪ শতক অৰ্জন কৰে ৰবিচন্দ্ৰন অশ্বিনে। ৮ নম্বৰত সৰ্বাধিক শতক অৰ্জন কৰাৰ অভিলেখ নিউজিলেণ্ডৰ প্ৰাক্তন অধিনায়ক ডেনিয়েল ভেট’ৰীৰ হাতত আছে, যিয়ে এই স্থানত ৫টা শতক অৰ্জন কৰিছিল। ভাৰতে ১৯১ ৰান সংগ্ৰহ কৰি ষষ্ঠটো উইকেট হেৰুওৱাৰ সময়ত বেটিং কৰিবলৈ আহিছিল নীতিশ ৰেড্ডী। সেই সময়ত টীম ইণ্ডিয়াক ফ’ল’অনৰ পৰা হাত সাৰিবলৈ ৮৪ ৰানৰ প্ৰয়োজন হৈছিল। ৰবীন্দ্ৰ জাদেজাও অতি সোনকালে আউট হৈছিল যদিও তাৰ পিছত ৱাশ্বিংটন সুন্দৰৰ সৈতে নীতিশৰ ১২৭ ৰানৰ পাৰ্টনাৰশ্বিপেৰে টীম ইণ্ডিয়াই পৰাজয়ৰ পৰিস্থিতি অতিক্ৰম কৰি এনে এটা পৰ্যায়ত উপনীত হোৱাত সহায় কৰিছিল য’ৰ পৰা ই মেচ জয় কৰাৰ কথা ভাবিব পাৰে। উল্লেখ্য যে এই ছিৰিজত ভাৰতৰ হৈ বৰ্তমান সৰ্বাধিক ৰান সংগ্ৰহকাৰী হৈছে নীতিশ।