নিয়মীয়া বাৰ্তা ডিজিটেল, ১১ ডিচেম্বৰঃ বৰ্ডাৰ-গাভাস্কাৰ ট্ৰফীত ভাৰত-অষ্ট্ৰেলিয়া ১-১ত জয়ী হৈ আছে। এতিয়া ভাৰত আৰু অষ্ট্ৰেলিয়াৰ তৃতীয়খন টেষ্ট মেচ ব্রিজবেন চহৰৰ গাব্বা ক্ৰিকেট খেলপথাৰত অনুষ্ঠিত হ’ব। এই টেষ্ট মেচখন ১৪ ডিচেম্বৰৰ পৰা ১৮ ডিচেম্বৰলৈ অনুষ্ঠিত হ’ব। এই টেষ্ট মেচখন ঋষভ পণ্ট আৰু মহম্মদ চিৰাজৰ বাবে অতি বিশেষ বুলি প্ৰমাণিত হ’ব পাৰে। কাৰণ গাব্বা ক্ৰিকেট খেলপথাৰত বিশেষ অভিলেখ গঢ়িবলৈ দুয়োখনেই মাত্ৰ কেইখোজমান দূৰত। উল্লেখ্য যে ২০২১ চনত গাব্বা ক্ৰিকেট খেলপথাৰত ভাৰত আৰু অষ্ট্ৰেলিয়াৰ মাজত অনুষ্ঠিত টেষ্ট মেচত ৩ উইকেটত জয়ী হ’বলৈ সক্ষম হৈছিল ভাৰত। সেই জয়ৰ নায়ক আছিল ঋষভ পণ্ট, যিয়ে ১৩৮ বলত ৮৯ ৰানৰ উজ্জ্বল ইনিংছ খেলি দলটোক তিনিটা উইকেটত জয়ৰ দিশত আগুৱাই লৈ যায়। এইবাৰো সকলোৰে চকু পণ্টৰ ওপৰত। গাব্বাত অনুষ্ঠিত এখন টেষ্টত ১১২ ৰান সংগ্ৰহ কৰিছে ঋষভ পণ্টে। যদি তেওঁ আৰু ৬৩ ৰান কৰে তেন্তে তেওঁ গাব্বা খেলপথাৰত সৰ্বাধিক ৰান কৰা ভাৰতীয় বেটছমেন হিচাপে পৰিগণিত হ’ব। বৰ্তমান এই তালিকাৰ শীৰ্ষত আছে এম এল জয়সিংহ, যিয়ে এখন মেচত ১৭৫ ৰান সংগ্ৰহ কৰিছিল। ইফালে গাব্বাত ভাৰতীয় বেটছমেনৰ প্ৰদৰ্শন এনেধৰণ মুৰালী বিজয় ১৭১ ৰান (১ মেচ), আজিংক্য ৰাহানে ১৫২ ৰান (২ মেচ), সৌৰভ গাংগুলী ১৪৪ ৰান (১ মেচ)। আনহাতে অভিলেখ গঢ়াৰ সুযোগ আছে তাৰকা বেগী বলাৰ মহম্মদ ছিৰাজৰো। মহম্মদ ছিৰাজেও এই পৰীক্ষাত অভিলেখ গঢ়িব পাৰে। গাব্বাত তেওঁ ৬ উইকেট দখল কৰিছে। যদি তেওঁ আৰু তিনিটা উইকেট লয় তেন্তে তেওঁ গাব্বাত ভাৰতৰ হৈ সৰ্বাধিক উইকেট দখলকাৰী বলাৰ হিচাপে পৰিগণিত হ’ব। ইফালে গাব্বাত ভাৰতীয় বলাৰৰ প্ৰদৰ্শন এনেধৰণ এৰাপল্লী প্ৰসন্ন ৮ উইকেট (২ মেচ) শাৰ্দুল ঠাকুৰ ৭ উইকেট (১ মেচ)। আনহাতে গাব্বা টেষ্ট ভাৰতীয় দলৰ বাবেও অগ্নিপৰীক্ষাসদৃশ। কিয়নো গাব্বাত পৰাজয় মানে বিশ্ব টেষ্ট চেম্পিয়নশ্বিপৰ পৰা একপ্ৰকাৰ বাহিৰ।