নিয়মীয়া বাৰ্তা, ৩০ জানুৱাৰীঃ অসম ক্ৰিকেট সন্থাৰ তত্বাৱধানত আৰু চৰাইদেউ জিলা ক্ৰীড়া সন্থাৰ উদ্যোগত সোণাৰিৰ সমীপৰ ৰতনপুৰ চাহ বাগিচা খেলপথাৰত অনুষ্ঠিত হোৱা অসম প্ৰিমীয়াৰ ক্লাব চেম্পিয়নশ্বিপত যোৱাবাৰৰ বিজয়ী সোণাৰি টাউন ক্লাবে খিতাপ দখল কৰিবলৈ সক্ষম হৈছে। আজি অনুষ্ঠিত হোৱা ফাইনেল খেলখনত সোণাৰি টাউন ক্লাবে মৰাণ অলপাইন বয়েজ ক্লাবক ৯৮ ৰানত পৰাজিত কৰে। আজি পুৱা মৰাণ অলপাইন বয়েজ ক্লাবে টছ্ত জয়ী হয় সোণাৰি টাউন ক্লাবক বেট ধৰিবলৈ আমন্ত্ৰণ জনায়। সোণাৰি টাউন ক্লাবে ৰাজনীক মগৰৰ ৫১, সমীৰ দেওৰাৰ ২৮ আৰু অনুপজ্যোতি বৰুৱাই কৰা ২৩ ৰানৰ সহায়ত ৩৪.৫ অভাৰত আটাইকেইটা উইকেট হেৰুৱাই ১৬০ ৰান কৰে। মৰাণ দলৰ হৈ সত্যব্ৰত কুমাৰে সৰ্বোচ্চ ৫টা আৰু সন্দ্বীপ নেওগে ২টা উইকেট লাভ কৰে। প্ৰত্যুত্তৰত মৰাণ অলপাইন বয়েজ ক্লাবে সমীৰ আহমেদৰ সৰ্বোচ্চ ১৪ আৰু সোমন লামৰ ১১ ৰানৰ সহায়ত ১৯.৩ অভাৰত আটাইকেইটা উইকেট হেৰুৱাই মাত্ৰ ৬২ ৰান কৰিবলৈ সক্ষম হয়। বিজয়ী দলটোৰ হৈ সমীৰ দেউৰাই সৰ্বাধিক ৫ টা, ৰিদিপ মোহন আৰু বিশাল নেৱাৰে দুটাকৈ উইকেট দখল কৰিবলৈ সক্ষম হয়। আজিৰ খেলখন পৰিচালনা কৰে সত্যজিৎ সন্দিকৈ আৰু পার্থজ্যোতি গগৈয়ে। চূড়ান্ত খেলৰ অন্তত অনুষ্ঠিত হোৱা বঁটা বিতৰণি সভাত চেম্পিয়ন দল সোণাৰি টাউন ক্লাবক ট্ৰফী আৰু ১ লাখ টকাৰ চেক প্ৰদান কৰে আমন্ত্ৰিত অতিথি হিচাপে উপস্থিত থকা সাংবাদিক মৃত্যুঞ্জয় দাস আৰু ক্ৰীড়া সংগঠক ললিত চাবুকধৰাই । আনহাতে বিজিত দল মৰাণ অলপাইন বয়জ ক্লাবক ট্ৰফী প্ৰদান কৰে জিলা পৰিষদৰ সদস্য ৰাজ নায়ক আৰু চৰাইদেউ জিলা ক্ৰীড়া সন্থাৰ সাধাৰণ সম্পাদক ইমদাদ হুছেইনে। ক্ৰীড়া সংগঠক, সাংবাদিক হানচেং কোঁৱৰে আঁত ধৰা অনুষ্ঠানটোত সোণাৰি টাউন ক্লাবৰ সমীৰ দেউৰাক ফাইনেলৰ মেন অফ দা মেচ, বিজয়ী দলটোৰ সুৰজিত ৰাজকোঁৱৰক টুৰ্ণামেণ্টৰ শ্ৰেষ্ঠ বেটছমেন আৰু বিজিত দলটোৰ সন্দ্বীপ নেওগক শ্ৰেষ্ঠ বলাৰৰ পুৰস্কাৰেৰে পুৰস্কৃত কৰা হয়।
প্ৰেৰক আব্দুল জাব্বাৰ