নিউজ ডেস্ক, ২ এপ্ৰিলঃ ‘২০২৭ চনৰ এদিনীয়া বিশ্বকাপ জয় কৰাটোৱে পৰৱর্তী লক্ষ্য৷’ – এই মন্তব্য টীম ইণ্ডিয়াৰ তাৰকা বেটাৰ বিৰাট কোহলিৰ৷ এদিনীয়া ক্রিকেটৰ পৰা ক্রিকেটাৰগৰাকীৰ অৱসৰক লৈ চলি থকা জল্পনা–কল্পনাৰ অন্ত পেলাই কোহলিয়ে কয় যে ২০২৭ চনৰ এদিনীয়া বিশ্বকাপ পর্যন্ত তেওঁ খেলি যাব৷ তাৰকা ক্রিকেটাৰগৰাকীৰ মন্তব্যৰ পৰাই জানিব পৰা যায় যে তেওঁ এতিয়াই এদিনীয়া ক্রিকেটৰ পৰা অৱসৰ ল’ব বিচৰা নাই৷ আগন্তুক আৰু দুবছৰ ভাৰতীয় এদিনীয়া দলটোৰ হৈ খেলাৰ ইচ্ছা ব্যক্ত কৰিছে কিং কোহলিয়ে৷ চলিত আইপিএলৰ মাজতে এটা অনুষ্ঠানত ভাগ লোৱা বিৰাট কোহলিক এদিনীয়া কেৰিয়াৰৰ অৱসৰ সন্দর্ভত সোধা এটা প্রশ্ণোত্তৰত তাৰকা বেটাৰগৰাকীয়ে কয় – ‘পৰৱর্তী লক্ষ্য কি মই এতিয়াও নাজানো৷ সম্ভৱতঃ ২০২৭ চনৰ এদিনীয়া বিশ্বকাপ জয় কৰা৷ দক্ষিণ আফ্রিকাত অনুষ্ঠিত হ’বলগীয়া পৰৱর্তী এদিনীয়া বিশ্বকাপ জয় কৰাৰ চেষ্টা কৰিম৷ সেয়া মোৰ পৰৱর্তী ডাঙৰ পদক্ষেপ৷’ ১০ মাহত টি–২০ বিশ্বকাপ আৰু চেম্পিয়ন ট্রফী জয় কৰা ভাৰতীয় দলটোৰ অন্যতম সদস্য কোহলিয়ে ২০২৭ চনৰ এদিনীয়া বিশ্বকাপ দেশক উপহাৰ দিয়াৰ সপোন মনত পুহি ৰাখিছে৷ মন কৰিবলগীয়া যে অষ্ট্রেলিয়াত অনুষ্ঠিত ব’ৰ্ডাৰ–গাভাস্কাৰ ট্রফীত দুর্বল প্রদর্শন আগবঢ়োৱাৰ বাবে দেশজুৰি সমালোচনাৰ সন্মুখীন হোৱা কোহলিয়ে সদ্যসমাপ্ত চেম্পিয়নছ ট্রফীত পাকিস্তানৰ বিপক্ষে খেলা হাইভল্টেজ মেচখনত শতকীয় ইনিংছ খেলি সমালোচকক যোগ্য প্রত্যুত্তৰত দিছিল৷ প্রতিযোগিতাখনত অষ্ট্রেলিয়াৰ বিৰুদ্ধে খেলা মেচখনতো ৮৪ ৰানৰ দর্শনীয় ইনিংছ খেলিছিল যদিও ফাইনেল মেচখনত তেওঁ সম্পূর্ণৰূপে ব্যর্থ হৈছিল৷ অৱশ্যে প্রতিযোগিতাখনত টীম ইণ্ডিয়াই চেম্পিয়নৰ সন্মান লাভ কৰিবলৈ সক্ষম হয়৷ ২০১১ চনৰ এদিনীয়া বিশ্বকাপৰ চেম্পিয়ন ভাৰতীয় দলটোৰ সদস্য কোহলিয়ে ২০২৩ চনৰ এদিনীয়া বিশ্বকাপৰ ফাইনেলত প্রৱেশ কৰিও খিতাপ জয় কৰাৰ পৰা বঞ্চিত হৈছিল৷ প্রতিযোগিতাখনৰ ১১খন মেচত ৭৬৫ ৰান কৰি কোহলিয়ে শ্রেষ্ঠ খেলুৱৈৰ বঁটা লাভ কৰিছিল৷ উল্লেখ্য যে ২০১১ চনৰ পিছত ভাৰতীয় দলটোৱে এদিনীয়া বিশ্বকাপৰ খিতাপ জয় কৰিবলৈ সক্ষম হোৱা নাই৷ ২০১৫ আৰু ২০১৯ চনৰ এদিনীয়া বিশ্বকাপৰ ছেমিফাইনেলৰ পৰা বিদায় লৈছিল টীম ইণ্ডিয়াই৷ ২০২৩ চনত ঘৰৰ মাটিত অনুষ্ঠিত এদিনীয়া বিশ্বকাপৰ খিতাপ জয় কৰাৰ সুযোগ লাভ কৰিছিল ভাৰতে৷ প্রতিযোগিতাখনৰ ক্রমাগত ১১খন মেচত অপৰাজেয় হৈ থকা ভাৰতীয় দলটোৱে ফাইনেলত অষ্ট্রেলিয়াৰ হাতত পৰাজয় স্বীকাৰ কৰিছিল৷