🔹 হাৰাৰেত আজি চতুর্থ টি–২০
বিশেষ বাৰ্তা, ১৩ জুলাই : হাৰাৰেত টি–২০ শৃংখলা দখলৰ লক্ষ্য লৈছে যুৱ খেলুৱৈৰে সমৃদ্ধ ভাৰতীয় দলে৷ ঘৰুৱা দল জিম্বাব’ৱৰে খেলি থকা পাঁচখনীয়া টি–২০ মেচৰ শৃংখলাটোৰ চতুর্থখন মেচ আজি হাৰাৰেত অনুষ্ঠিত হ’ব৷ ইতিমধ্যে শৃংখলাটোত ২–১ত অগ্রগতি লাভ কৰা শুভমন গিল নেতৃত্বাধীন ভাৰতীয় দলটোৱে আজিৰ মেচত বিজয় সাব্যস্ত কৰি ৩–১ৰ অগ্রগতিৰে শৃংখলাটো দখল কৰাৰ লক্ষ্য লৈছে৷ আজিৰ মেচখনৰ মূল একাদশত বিশেষ সালসলনি ঘটোৱাৰ সম্ভাৱনা নাই বুলি ইংগিত দি ভাৰতীয় দলটোৰ অধিনায়ক শুভমন গিলে কয় যে বিগত মেচখনত সতীর্থসকলে সুন্দৰ প্রদর্শন দাঙি ধৰিছে৷ আশা কৰিছোঁ– কাইলৈৰ মেচতো তেওঁলোকে নিজৰ দায়িত্ব পালন কৰি দলৰ জয়ত গুৰুত্বপূর্ণ ভূমিকা পালন কৰিব৷ বিৰাট কোহলি, ৰোহিত শর্মাকে ধৰি কেইবাজনো তাৰকা খেলুৱৈৰ অনুপস্থিতিত চলিত টি–২০ শৃংখলাটো যুৱ খেলুৱৈৰে সমৃদ্ধ ভাৰতীয় দলটোৰ বাবে বিশেষ গুৰুত্বপূর্ণ হিচাপে বিবেচিত হৈছে৷ অৱশ্যে সতীর্থসকলে আশানুৰূপ প্রদর্শন দাঙি ধৰিবলৈও সক্ষম হৈছে৷ যশস্বী জয়ছোৱাল, ৰুতুৰাজ গাইকোৱাড, অভিষেক শর্মা, সঞ্জু ছেমছনে নিজৰ দায়িত্ব সুচাৰুৰূপে পালন কৰিছে৷ যুৱ খেলুৱৈসকলে এই শৃংখলাত উন্নত প্রদর্শন দাঙি ধৰি পৰৱর্তী শৃংখলাত ভাৰতীয় দলত স্থান লাভ কৰাৰ সুন্দৰ সুযোগ লাভ কৰিছে৷ অৱশ্যে আজিৰ মেচখনত জয়লাভ কৰিবলৈ হ’লে ঘৰুৱা দলটোৰ সন্মুখত বৃহৎ স্ক’ৰ থিয় কৰাব লাগিব৷ কাৰণ ঘৰুৱা দলটোৱে শৃংখলাটোত প্রত্যাৱর্তন কৰাৰ বাবে আজিৰ মেচখনত জয়লাভ কৰিবলৈ সকলো ধৰণৰ প্রচেষ্টা আগবঢ়াব৷ খেলৰ সময় : বিয়লি ৪.৩০ বজা৷