নিয়মীয়া বাৰ্তা, ১ ফেব্ৰুৱাৰী: ভাৰতৰ বিশ্বকাপ বিজয়ী ১৯ বছৰ অনূর্ধ্ব মহিলা দলটোক বিশেষভাৱে সন্মান জনাব ভাৰতীয় ক্রিকেট ব’র্ডে৷ আজি আহমেদাবাদত ভাৰত আৰু নিউজিলেণ্ডৰ মাজত অনুষ্ঠিত হ’ব লগা তৃতীয়খন টি–২০ মেচৰ পূর্বে সম্বর্ধনা জনোৱা হ’ব দলটোক৷ তেওঁলোকক সন্মান জনাব প্রাক্তন ক্রিকেটাৰ শচীন তেণ্ডুলকাৰে৷ টুইটত ভাৰতীয় ক্রিকেট ব’ৰ্ডৰ সচিব জয় শ্বাহে উল্লেখ কৰিছে এইদৰে– ‘আমি জনাবলৈ পাই সুখী হৈছোঁ যে ১৯ বছৰ অনূর্ধ্ব বিশ্বকাপ বিজয়ী ভাৰতীয় দলটোক ১ ফেব্রুৱাৰীত নৰেন্দ্র মোদী ষ্টেডিয়ামত ৬.৩০ বজাত ভাৰত ৰত্ন শচীন তেণ্ডুলকাৰৰ জৰিয়তে সম্বর্ধনা জনোৱা হ’ব৷’
তেওঁ লগতে কয় যে যুৱ ক্রিকেটাৰসকলে ভাৰতক গৌৰৱান্বিত কৰিছে আৰু তেওঁলোকৰ সফলতাক সন্মান জনোৱা হ’ব৷ উল্লেখ্য যে শেফালি বার্মা নেতৃত্বাধীন ভাৰতীয় দলটোৱে দক্ষিণ আফ্রিকাত সদ্যসমাপ্ত ১৯ বছৰ অনূর্ধ্ব মহিলাৰ টি–২০ বিশ্বকাপত ইংলেণ্ডক ৭ উইকেটত পৰাস্ত কৰি ট্রফী অর্জন কৰে৷ ঘটনাক্রমে মহিলা ক্রিকেটত এইটোৱে ভাৰতৰ প্রথম বিশ্বকাপ ট্রফী৷ বিশ্বকাপ দখল কৰি দলটো আজি মুম্বাইত উপস্থিত হৈছে আৰু তাৰ পৰা তেওঁলোকে আজি আহমেদাবাদত উপস্থিত হ’ব৷