নিয়মীয়া বাৰ্তা, ১৮ জানুৱাৰীঃ নাগৰিকত্ব সংশোধনী আইন বাতিলৰ দাবীত দেশজুৰি অব্যাহত থকা ৰণসদৃশ পৰিস্থিতিৰ সময়তে পশ্চিমবংগত কা বিৰোধী আন্দোলনৰ এক অনুষ্ঠানত দুগৰাকী যুৱতীৰ উদ্দাম নৃত্যই এতিয়া ব্যাপক প্ৰতিক্ৰিয়াৰ সৃষ্টি কৰিছে ।

আনহাতে যি মঞ্চত এই উদ্দাম নৃত্য পৰিবেশন কৰা হৈছিল, তাৰ থিক তলতে পশ্চিমবংগৰ মুখ্যমন্ত্ৰী মমতা বেনাৰ্জীৰ এক প’ষ্টাৰসহ ডাঙৰ ডাঙৰ আখৰেৰে লিখা আছিল-“NO CAA NO NRC . মানছি না মানব না ।”

উল্লেখ্য যে এই কা বিৰোধী অনুষ্ঠান পশ্চিবংগৰ মালদা অঞ্চলত তৃণমূল কংগ্ৰেছৰ যুৱ মৰ্চাই অনুষ্ঠিত কৰিছিল । কিন্তু এই অনুষ্ঠানৰ মাজতে দুই যুৱতীৰ এনে উদ্দাম নৃত্য এতিয়া ছ’চিয়েল মিডিয়াত ভাইৰেল হৈ পৰিছে ।

পশ্চিমবংগৰ এক সংবাদ প্ৰতিষ্ঠানে প্ৰকাশ কৰা এই নৃত্যৰ ভিডিঅ’ চাওক-

The post CAA আন্দোলনৰ মাজতে ২ যুৱতীৰ উদ্দাম নৃত্য; চাওক ভিডিঅ’- first appeared on নিয়মীয়া বাৰ্তা.

নিয়মীয়া বাৰ্তা, ৬ ফেব্ৰুৱাৰীঃ কটন বিশ্ববিদ্যালয়ৰ প্রাক্তন সাধাৰণ সম্পাদক প্রাঞ্জল কলিতাক ‘নিয়া’ৰ কার্যালয়ত হাজিৰ হ’বলৈ  চমন জাৰি কৰিছে ৷ আজি দিনৰ ১১ বজাত ‘নিয়া’ৰ কার্যালয়ত প্রাঞ্জল কলিতাই হাজিৰ হ’ব লাগিব৷

মাওবাদী সংগঠনৰে সম্পর্ক, দেশদ্রোহ আৰু নাগৰিকত্ব সংশোধনী আইন (কা) বিৰোধী আন্দোলনৰ নামত হিংসাৰ উচটনি দিয়াৰ অভিযোগ সন্দর্ভত নিয়াৰ তদন্তকাৰী বিষয়াই প্রাঞ্জল কলিতাক জেৰা কৰিব ৷

The post ‘কা’বিৰোধী আন্দোলনত হিংসাঃ কটনৰ প্রাক্তন সাঃ সম্পাদকক নিয়াৰ চমন first appeared on নিয়মীয়া বাৰ্তা.

নিয়মীয়া বাৰ্তা, ৩ ফেব্ৰুৱাৰীঃ কেন্দ্ৰীয় মন্ত্ৰী ৰামেশ্বৰ তেলীৰ বাসগৃহত আক্ৰমণৰ ঘটনা সন্দৰ্ভত গ্ৰেপ্তাৰ কৰা হৈছে এজন যুৱকক । আৰক্ষীয়ে গ্ৰেপ্তাৰ কৰা যুৱকজন হৈছে বিজেপি যুৱ মৰ্চাৰ সদস্য দেৱজিৎ হাজৰিকা । উল্লেখ্য যে ১১ ডিচেম্বৰত কা’ বিৰোধী আন্দোলনকাৰীয়ে আক্ৰমণ কৰিছিল কেন্দ্ৰীয় মন্ত্ৰী ৰামেশ্বৰ তেলীৰ বাসগৃহত ।

এই আক্ৰমণত জড়িত থকাৰ অভিযোগত আৰক্ষীয়ে দেওবাৰে নিশা নিজ বাসগৃহৰ পৰা গ্ৰেপ্তাৰ কৰে বিজেপি যুৱ মৰ্চাৰ সদস্য দেৱজিৎ হাজৰিকাক ।

The post ৰামেশ্বৰ তেলীৰ বাসগৃহত আক্ৰমণত জড়িত বিজেপি যুৱ মৰ্চাৰ সদস্যক গ্ৰেপ্তাৰ first appeared on নিয়মীয়া বাৰ্তা.

নিয়মীয়া বাৰ্তা, ৩১ জানুৱাৰীঃ সংসদৰ যুটীয়া অধিৱেশন সম্বোধন কৰি আজি ৰাষ্ট্ৰপতি ৰামনাথ কোবিন্দে অধিৱেশনৰ প্ৰথম দিনাই নাগৰিকত্ব সংশোধনী আইনৰ সন্দৰ্ভত মন্তব্য কৰে । ৰাষ্ট্ৰপতিগৰাকীয়ে কয়- প্ৰতিবাদৰ নামত হিংসাই দেশক দুৰ্বল কৰে । লগতে চৰকাৰে কা’ প্ৰণয়ন কৰি ৰাষ্ট্ৰপিতা মহাত্মা গান্ধীৰ ইচ্ছা পূৰণৰ চেষ্টা কৰিছে । এই ভাষণৰ পাছতে সংসদত উপস্থিত থকা সকলোৱে হাতচাপৰিৰে এই মন্তব্যৰ আদৰণি জনায় ।

ৰাষ্ট্ৰ নিৰ্মাতাসকলৰ ইচ্ছাক সন্মান কৰা আমাৰ দায়িত্ব-ৰাষ্ট্ৰপতি কোবিন্দ

ৰাষ্ট্ৰপতি ৰামনাথ কোবিন্দে লগতে কয়- “দেশ বিভাজনৰ পাছত মহাত্মা গান্ধীয়ে কৈছিল পাকিস্তানত বাস কৰা হিন্দু-শিখ যিসকলে তাত থাকিব নিবিচাৰে, তেওঁলোক ভাৰতলৈ আহিব পাৰে । বাপুজিৰ এই এনে বিচাৰ ধাৰাক বিভিন্ন সময়ত কিছুসংখ্যক নেতা-ৰাজনৈতিক দলেও আগুৱাই নিছে । গতিকে আমাৰ ৰাষ্ট্ৰ নিৰ্মাতাসকলৰ ইচ্ছাক সন্মান কৰা আমাৰ দায়িত্ব ।”

যিকোনো প্ৰান্তৰ লোকে ভাৰতীয় নাগৰিকত্ব পাব পাৰে-ৰাষ্ট্ৰপতি কোবিন্দ

ৰাষ্ট্ৰপতিগৰাকীয়ে নিজৰ ভাষণত আৰু কয়- “চৰকাৰে পুনৰ এইটো স্পষ্ট কৰে যে ভাৰতৰ প্ৰতি আস্থা ৰখা আৰু ভাৰতীয় নাগৰিকত্ব ল’বলৈ ইচ্ছুক বিশ্বৰ যিকোনো প্ৰান্তৰ লোকৰ বাবে পূৰ্বে যি অধিনিয়ম আছিল, সেয়া আজিও আছে । যিকোনো প্ৰান্তৰ লোকে এই অধিনিয়মসমূহ পালন কৰি ভাৰতীয় নাগৰিকত্ব পাব পাৰে ।”

The post CAA ক লৈ সংসদত ৰাষ্ট্ৰপতিৰ মন্তব্য: “প্ৰতিবাদৰ নামত হিংসাই দেশক দুৰ্বল কৰে” first appeared on নিয়মীয়া বাৰ্তা.

নিয়মীয়া বাৰ্তা, ১৯ জানুৱাৰীঃ নাগৰিকত্ব সংশোধনী আইনক লৈ দেশজুৰি প্ৰতিবাদ অব্যাহত থকাৰ সময়তে দেওবাৰে কেন্দ্ৰীয় বিত্তমন্ত্ৰী নিৰ্মলা সীতাৰমনে দাঙি ধৰে পাকিস্তানী , বাংলাদেশী আৰু আফগানী লোকে ভাৰতত নাগৰিকত্ব পোৱাৰ হিচাপ । দেওবাৰে চেন্নাইত নাগৰিকত্ব সংশোধনী আইন ২০১৯ সম্পৰ্কত হোৱা এক অনুষ্ঠানত এই তথ্যসমূহ দাঙি ধৰে বিত্তমন্ত্ৰী গৰাকীয়ে ।

বিগত ৬ বছৰত ২৮৩৮ পাকিস্তানী শৰনাৰ্থী, ৯১৪ আফগানী শৰনাৰ্থী আৰু ১৭২ বাংলাদেশী শৰনাৰ্থীক ভাৰতত নাগৰিকত্ব দিয়া হৈছে । এই শৰনাৰ্থীসকলৰ ভিতৰত মুছলমান ধৰ্মৰ লোকও আছে । ১৯৬৪ ৰ পৰা ২০০৮ লৈকে ৪,০০,০০০ তকৈ অধিক শ্ৰীলংকাৰ তামিলক নাগৰিকত্ব প্ৰদান কৰা হৈছে বুলিও চেন্নাইৰ এই অনুষ্ঠানতে উল্লেখ কৰে নিৰ্মলা সীতাৰমনে ।

লগতে বিত্তমন্ত্ৰী গৰাকীয়ে উল্লেখ কৰে যে, ২০১৪ চনলৈকে ৫৬৬ গৰাকী পাকিস্তান, বাংলাদেশ আৰু আফগানিস্তানৰ মুছলমান লোককো দিয়া হৈছে ভাৰতৰ নাগৰিকত্ব । ২০১৬-১৮ ৰ ভিতৰত নৰেন্দ্ৰ মোডী চৰকাৰে প্ৰায় ১৫৯৫ গৰাকী পাকিস্তানী প্ৰব্ৰজনকাৰী আৰু ৩৯১ গৰাকী আফগানী মুছলমান লোকক নাগৰিকত্ব প্ৰদান কৰা হৈছে । একে সময়তে ২০১৬ চনত আদনান স্বামীকো ভাৰতীয় নাগৰিকত্ব প্ৰদান কৰা হৈছিল । ঠিক একেদৰে তছলিমা নাছৰিনক ভাৰতীয় নাগৰিকত্ব প্ৰদান কৰা বিষয়টো অন্য এক উদাহৰণ বুলিও কয় বিত্তমন্ত্ৰীগৰাকীয়ে ।

লগতে বিত্তমন্ত্ৰী গৰাকীয়ে পূব পাকিস্তানৰ পৰা ভাৰতলৈ অহা লোকসকলৰ কথাও উল্লেখ কৰে ভাষণত । বিভিন্ন শিবিৰত প্ৰায় ৫০-৬০ বছৰ ধৰি বসবাস কৰি থকা এইসকল শৰনাৰ্থীৰ দুৰ্বিসহ জীৱন চকুৰে দেখিলে সকলোৰে চকুলো ওলাব বুলিও কয় নিৰ্মলা সীতাৰমনে । নাগৰিকত্ব সংশোধনী আইনে এইসকল লোকক দুৰ্বিসহ জীৱনৰ পৰা মুক্তি দিয়াৰ লগতে সুন্দৰকৈ বসবাস কৰাৰ বাবেহে এক প্ৰচেষ্টা হাতত লৈছে বুলি উল্লেখ কৰে বিত্তমন্ত্ৰী গৰাকীয়ে ।

নিজৰ ভাষণ প্ৰসংগত বিত্তমন্ত্ৰী গৰাকীয়ে একাংশ লোকে এনপিআৰ আৰু এনআৰচিৰ মাজত এক অপপ্ৰচাৰ চলাইছে বুলি কয় । প্ৰতি দহবছৰৰ মূৰে মূৰে উন্নীত হ’ব লগা এন পি আৰৰ সৈতে ৰাষ্ট্ৰীয় নাগৰিকপঞ্জীৰ কোনো সম্পৰ্ক নাই বুলি কয় নিৰ্মলা সীতাৰমনে ।

The post ২৮৩৮ পাকিস্তানী, ৯১৪ আফগানী, ১৭২ বাংলাদেশীক দিয়া হৈছে নাগৰিকত্ব, মুঠ কিমান শৰনাৰ্থীক নাগৰিকত্ব দিয়া হ’ল ? first appeared on নিয়মীয়া বাৰ্তা.

নিয়মীয়া বাৰ্তা, ৪ জানুৱাৰীঃ কংগ্ৰেছ আৰু বাওঁপন্থীৰ দৰে আমাৰ চৰিত্ৰ নহয়, জন্মৰে পৰা ভাৰতীয় জনতা পাৰ্টীয়ে অসমৰ হৈ মাত মাতি আহিছে । ৬ বছৰীয়া অসম আন্দোলনত ভাৰতৰ প্ৰাক্তন প্ৰধানমন্ত্ৰী স্বৰ্গীয় অটল বিহাৰী বাজপেয়ী দেৱে অসমৰ ৰাইজৰ হৈ আন্দোলনত নামিছিল । তাৰ পাচতো সেই বিজেপি দল আৰু বিজেপি চৰকাৰে অসমৰ ক্ষতি কৰিব পৰা কাম কৰিব বুলি ভবাটো অত্যন্ত ভুল । গতিকে আন্দোলনকাৰী সকলক মই কওঁ ইতিহাস অধ্যয়ন নকৰাকৈ কথা ক’লে ক্ষমা নকৰে ইতিহাসে – শনিবাৰে গুৱাহাটীৰ খানাপাৰাত অনুষ্ঠিত বিজেপি বুথ কমিটীৰ বিশেষ সভাত এইদৰে মন্তব্য কৰে মুখ্যমন্ত্ৰী সৰ্বানন্দ সোণোৱালে ।

নিজৰ ভাষণ প্ৰসংগত মুখ্যমন্ত্ৰী গৰাকীয়ে কয় যে, অসম সদায় অসমীয়াৰ হাততে থাকিব । নাগৰিকত্ব সংশোধনী আইনক লৈ কোনোৱে চিন্তিত হোৱাৰ প্ৰয়োজন নাই । অসম তথা অসমীয়াৰ চোতালত বিদেশীৰ দপদপনি নচলিব । বিজেপি শাসিত এইখন খিলঞ্জীয়াৰ চৰকাৰক ওফৰোৱাৰ ষড়যন্ত্ৰত লিপ্ত হৈ একাংশই নিকৃষ্ট ৰাজনীতিৰ আশ্ৰয় লৈছে বুলিও উল্লেখ কৰে মুখ্যমন্ত্ৰী গৰাকীয়ে ।

যোৱা তিনিটা বছৰৰো অধিক সময়ত এইখন চৰকাৰে খিলঞ্জীয়া ভূমিপুত্ৰৰ বিৰুদ্ধে কোনো ব্যৱস্থা গ্ৰহণ কৰা নাই বুলি উল্লেখ কৰি এইখন চৰকাৰৰ শাসনৰ সময়ত ৮ খনকৈ মেডিকেল কলেজ , ৯ খনকৈ অভিযান্ত্ৰিক মহাবিদ্যালয়ৰ লগতে শিক্ষাৰ ক্ষেত্ৰত নতুন প্ৰজন্মক আগুৱাই নিয়াৰ ব্যৱস্থা লোৱা বুলি উল্লেখ কৰে । আনকি ছাত্ৰ-ছাত্ৰীৰ বিনামূলীয়া নামভৰ্তি, বিনামূলীয়া পাঠ্যপুথি, জলপানি আদিৰ প্ৰসংগ উল্লেখ কৰি বিজেপি চৰকাৰে কৃষক সকলক সৱল কৰাৰ বাবে গ্ৰহণ কৰা আঁচনিৰ কথাও জনায় ।

নৰেন্দ্ৰ মোডী আৰু অমিত শ্বাহক অসমীয়াৰ শত্ৰু বুলি একাংশই উল্লেখ কৰি থাকিলেও কিন্তু এইখন চৰকাৰৰ শাসনত কেন্দ্ৰশাসিত বিজেপিয়ে অসমৰ বাবে মোকলাই দিছে মুঠ ৪২,০০০ কোটি টকা । নুমলীগড় শোধনাগাৰৰ উৎপাদন ক্ষমতা বৃদ্ধিৰ লগতে উত্তৰ-পূবৰ ভিতৰত সবাতোকৈ ডাঙৰ শোধনাগাৰ ৰূপে গঢ়ি তোলাৰ ক্ষেত্ৰত কেন্দ্ৰীয় চৰকাৰে লোৱা সিদ্ধান্তক শলাগ লয় মুখ্যমন্ত্ৰীগৰাকীয়ে । যিখন গামোচাত অসমৰ শিপিনীৰ সপোন থাকে সেই গামোচাক প্ৰধানমন্ত্ৰী নৰেন্দ্ৰ মোডীয়ে বিশ্বৰ বুকুত প্ৰতিষ্ঠা কৰা বুলি উল্লেখ কৰি বিজেপি চৰকাৰে অসম আৰু অসমীয়াবিৰোধী কোনো কাৰ্য নকৰে বুলি প্ৰতিশ্ৰুতি দিয়ে সোণোৱালে । ১০ খন ৰাষ্ট্ৰৰ মুৰব্বী প্ৰধান ভাৰতলৈ আগমনৰ সময়ত নৰেন্দ্ৰ মোডীয়ে অসমীয়া গামোচাৰে বৰণ কৰি অসমীয়া কৃষ্টিক বিশ্ব মঞ্চত প্ৰতিষ্ঠা কৰাৰ পাচতো যদি সন্দেহৰ আঙুলি টোৱায় , যি সময়ত আমি কোনো বেয়া কামেই কৰা নাই বুলি উল্লেখ কৰে সৰ্বানন্দ সোণোৱালে ।

বুথ কমিটীৰ এইসভাতে মুখ্যমন্ত্ৰীয়ে বুথ পৰ্যায়ৰ সকলো নেতাক নিজ নিজ অঞ্চলত এই অপপ্ৰচাৰ আৰু সন্দেহৰ বিৰুদ্ধে সকলো নাগৰিকক বুজাবলৈ আহ্বান জনায় । বুথ কমিটীৰ সভাৰ এই সমাগমে অসমৰ গণতন্ত্ৰত বিশ্বাসী লোকসকলক উৎসাহিত কৰিব বুলিও উল্লেখ কৰে সোণোৱালে ।

এই বিশেষ সভাখনতো মুখ্যমন্ত্ৰীয়ে আক্ৰমণৰ লক্ষ্য কৰি লয় কংগ্ৰেছ আৰু বাওঁপন্থী দলসমূহক । ভাৰতীয় জনতা পাৰ্টীৰ চৰিত্ৰ কংগ্ৰেছ আৰু বাওঁপন্থীৰ দৰে নহয় বুলি কৈ আন্দোলনকাৰীক এইদলসমূহৰ প্ৰৰোচনাত নপৰি সকলোকে আগুৱাই আহিবলৈ আহ্বান জনায় । দূৰত থাকি সন্দেহৰ আঙুলি টোওৱাতকৈ ইতিবাচক দৃষ্টিৰে বৰ অসম নিৰ্মাণৰ সংকল্প ল’বলৈ আহ্বান সৰ্বানন্দ সোণোৱালৰ ।

আন্দোলনৰ নামত বিজেপি কৰ্মীক আক্ৰমণৰ লক্ষ্য কৰি লোৱা বিষয়ত মুখ্যমন্ত্ৰীয়ে উল্লেখ কৰে যে, বিজেপি কৰ্মীসকল হৈছে সহিষ্ণু দল । বিজেপি নেতা-কৰ্মীসকলক উত্তেজিত কৰিব বিচাৰিছিল যদিও সহিষ্ণুতাৰে নিষ্ঠাবান কৰ্মীসকলে ধৈৰ্য ধৰিছিল বুলি উল্লেখ কৰে মুখ্যমন্ত্ৰী সৰ্বানন্দ সোণোৱালে ।

ইফালে , এই বৰ্ষৰ মাৰ্চ মাহতে অসমীয়া খিলঞ্জীয়া লোকৰ ভূমিৰ অধিকাৰ সুৰক্ষিত কৰাৰ বাবে প্ৰায় ৫০ লাখ লোকক প্ৰদান কৰা হ’ব মাটিৰ পট্টা । ইতিমধ্যে অসম চুক্তিৰ ৬ নং দফাৰ কাৰ্যকৰীকৰণৰ ক্ষেত্ৰত নৰেন্দ্ৰ মোডী নেতৃত্বাধীন বিজেপিয়ে যি পদক্ষেপ গ্ৰহণ কৰিছে সেই পদক্ষেপক অতবছৰে কোনো এখন চৰকাৰে গুৰুত্ব প্ৰদান নকৰিলে বুলি উল্লেখ কৰে সৰ্বানন্দ সোণোৱালে । অসম চুক্তিৰ ৬ নং দফাৰ জৰিয়তে খিলঞ্জীয়াৰ সাংবিধানিক ৰক্ষা কৱচৰ ক্ষেত্ৰত চৰকাৰে গ্ৰহণ কৰা পদক্ষেপে অসমীয়া জাতিক সৰ্বকালৰ কাৰণে সুৰক্ষিত কৰাৰ লগতে সকলো ক্ষেত্ৰতে খিলঞ্জীয়াৰ অধিকাৰ সাব্যস্ত হ’ব বুলিও কয় মুখ্যমন্ত্ৰীগৰাকীয়ে ।

The post ইতিহাস অধ্যয়ন নকৰাকৈ কথা ক’লে ইতিহাসে ক্ষমা নকৰেঃ মুখ্যমন্ত্ৰী first appeared on নিয়মীয়া বাৰ্তা.

নিয়মীয়া বাৰ্তা, ২৯ ডিচেম্বৰঃ নাগৰিকত্ব সংশোধনী আইনক লৈ শিল্পী, ছাত্ৰ সমাজ আৰু সদৌ অসম ছাত্ৰ সন্থাৰ প্ৰতিবাদ অব্যাহত থকাৰ সময়তে জুবিন গাৰ্গৰ ঘোষণা গঠন কৰিম নতুন আঞ্চলিকতাবাদী ৰাজনৈতিক দল । শনিবাৰে শুৱালকুছিত সদৌ অসম ছাত্ৰ সন্থা আৰু শিল্পী সমাজৰ কা বিৰোধী প্ৰতিবাদৰ মাজতে এই বিকল্পৰ কথা ঘোষণা কৰে শিল্পীগৰাকীয়ে ।

ভাষণ প্ৰসংগত যুৱ প্ৰজন্মৰ হাৰ্টথ্ৰৱ গৰাকীয়ে উল্লেখ কৰে যে, ২১ ৰ নিৰ্বাচনত মই কংগ্ৰেছ, বিজেপি অথবা অগপ কাকো সমৰ্থন দিব নোৱাৰো । গতিকে অসমীয়া মানুহক এতিয়া প্ৰয়োজন হৈছে বিকল্পৰ । ইয়াৰ বাবে ২০২১ চনৰ পূৰ্বে আমি এক বিকল্প আঞ্চলিকতাবাদী শক্তি গঠন কৰিব লাগিব বুলি উল্লেখ কৰে জুবিন গাৰ্গে ।

ইফালে , এই নতুন ৰাজনৈতিক দল গঠন কৰিব যদিও জুবিন গাৰ্গে ৰাজনীতিত অংশ নলয় বুলিও উল্লেখ কৰে । দলটোৰ বাবে সকলো প্ৰকাৰৰ সহায়-সহযোগিতা কৰাৰ প্ৰতিশ্ৰুতি প্ৰদান কৰিলেও কিন্তু নিজে নিৰ্বাচন আৰু ৰাজনীতিৰ পৰা বিৰত থাকিব বুলি কয় জুবিনে । নতুন শক্তিশালী আঞ্চলিক দল গঠনৰ প্ৰয়োজনীয়তা উল্লেখ কৰি সকলোৱে বিশ্বাসঘাটকতা কৰিছে বুলিও কয় শিল্পীগৰাকীয়ে ।

আনৰ ওপৰত বিশ্বাস কৰি বহুত মাৰ খালো এতিয়া আৰু মাৰ নাখাওঁ ওলোটাই মৰাৰ সময় এইয়া বুলিও এক তাৎপৰ্যপূৰ্ণ মন্তব্য কৰে শিল্পীগৰাকীয়ে । 

The post আৰু মাৰ নাখাওঁ, এতিয়া ওলোটাই মৰাৰ সময় first appeared on নিয়মীয়া বাৰ্তা.

নিয়মীয়া বাৰ্তা, ২৭ ডিচেম্বৰঃ তীর্থনগৰী হাজোত ‘কা’বিৰোধী প্রতিবাদেৰে ব্যাপক চর্চালৈ আহিছে এহাল দৰা–কইনা ৷

কিয়নো বিয়াৰ দিনাই দৰা–কইনাই বিৰোধিতা কৰিলে নাগৰিকত্ব সংশোধনী আইনৰ৷ ‘কা’বিৰোধী প্লেকার্ড  হাতত লৈ ৰভাতলীৰ পৰা দৰা–কইনাই কৰিলে অভিনৱ প্রতিবাদ৷

হাজোৰ দলৈতোলাৰ শিক্ষক ফিৰোজ আলীৰ জীয়াৰী নাহৰ ইফতিহাম আনজুমৰ সৈতে হাজোৰ বৰম্বৈৰ ৰেকিব আহমেদ নামৰ যুৱকজনৰ বৃহস্পতিবাৰে নিকাহ সম্পন্ন হয়৷

বিবাহথলীত দৰা–কইনাই এনেকৈয়ে জাতিধ্বংসী আইনখনৰ বিৰুদ্ধে প্রতিবাদ কৰা ঘটনাই হাজোৰ বৃহত্তৰ অঞ্চলত ব্যাপক চর্চা লাভ কৰিছে৷

The post নাৰ্জী ফুলৰ মালা নহয়…‘কা’বিৰোধী প্লেকার্ড লৈ ৰভাথলীত দৰা–কইনা first appeared on নিয়মীয়া বাৰ্তা.

নিউজডেস্ক, ২৪ ডিচেম্বৰঃ সংশোধিত নাগৰিকত্ব আইনৰ বিৰুদ্ধে উচতনিমূলক ভাষণ প্ৰদান কৰাৰ অভিযোগত কংগ্রেছ নেত্ৰী ছোনিয়া গান্ধী, প্রিয়ংকা গান্ধী ভদ্রা আৰু কেবাজনো লোকৰ বিৰুদ্ধে উত্তৰ প্রদেশৰ আলীগড় মুখ্য ন্যায়িক দণ্ডাধীশ আদালতত এক গোচৰ ৰুজু হৈছে ।

এই গোচৰটো তৰিছে অধিবক্তা প্রদীপ গুপ্তাই ।

ইপিনে এই অভিযোগটোত আছাদুদ্দিন অ’ৱেছি আৰু সাংবাদিক ৰবিশ কুমাৰৰ নামো সন্নিৱিষ্ট হৈ আছে ।

আনহাতে আদালতে এই অভিযোগ গ্ৰহণ কৰি অহা ২৪ জানুৱাৰীত ইয়াৰ শুনানি নিৰ্ধাৰণ কৰিছে ।

উল্লেখ্য যে অভিযোগকাৰীৰ মতে নেতাসকলে তেওঁলোকৰ মন্তব্যত ২০১৪ চনৰ ৩১ ডিচেম্বৰৰ পিছত যিসকল লোক পাকিস্তান, আফগানিস্তান আৰু বাংলাদেশৰ পৰা আহিছিল সেই সকলো লোকেই সংশোধিত নাগৰিকত্ব আইন-২০১৯ ৰ অধিনত ভাৰতীয় নাগৰিকত্ব লাভ কৰিব বুলি কৈছিল ।

The post ছোনিয়া, প্রিয়ংকা, অ’ৱেছি আৰু ৰবিশ কুমাৰৰ বিৰুদ্ধে গোচৰ ৰুজু first appeared on নিয়মীয়া বাৰ্তা.