নিয়মীয়া বাৰ্তা, ২০ ফেব্ৰুৱাৰীঃ বিটিচিপ্রধান প্রমোদ বড়োৱে দাখিল কৰা এক মানহানি গোচৰ সন্দর্ভত শনিবাৰে আদালতত হাজিৰ হৈ জামিন ল’বলগীয়া হ’ল বি পি এফৰ মুৰব্বী হাগ্রামা মহিলাৰীয়ে৷ কোকৰাঝাৰৰ মুখ্য ন্যায়িক দণ্ডাধীশৰ আদালতত কালি প্রায় ৪৫ মিনিট সময় থাকি জামিন ল’বলৈ সক্ষম হ’ল মহিলাৰীয়ে৷
উল্লেখ্য যে ২০২০ চনৰ ১৩ ফেব্রুৱাৰীত বাক্সা জিলাৰ তামুলপুৰত অনুষ্ঠিত এবছুৰ বিশেষ অধিৱেশনত বিটিচিৰ বর্তমানৰ মুখ্য কার্যবাহী সদস্য প্রমোদ বড়োৱে ছাত্র সংগঠনটোৰ পৰা আনুষ্ঠানিকভাৱে বিদায় লৈছিল৷ সেইদিনা এবছুৰ পতাকা উত্তোলন কৰিবলৈ গৈ আৱেগিক হৈ পৰিছিল প্রমোদ বড়ো৷ আনকি দীর্ঘদিন ধৰি জড়িত হৈ থকাৰ পাছত এবছু ত্যাগ কৰা প্রমোদ বড়োৱে উচুপি উঠিছিল৷ কিন্তু এই বিষয়টোক লৈয়েই হাগ্রামা মহিলাৰীয়ে ৰাজহুৱাভাৱে প্রমোদ বড়ো সম্পর্কত বাৰম্বাৰ অপমানসূচক মন্তব্য কৰে৷
বিশেষকৈ উক্ত বর্ষৰ ৫ মার্চ আৰু ৩ আগষ্টত প্রমোদ বড়োক সমালোচনা কৰিবলৈ গৈ হাগ্রামা মহিলাৰীয়ে কৈছিল যে প্রমোদ বড়োৱে চকুলো টোকাৰ মূল কাৰণ হৈছে পাৰিবাৰিক সংঘাতৰ বাবে পত্নীয়ে তেওঁক এৰি থৈ যোৱা৷ এনে ধৰণৰ অপমানসূচক মন্তব্যৰ বাবে প্রমোদ বড়োৱে হাগ্রামা মহিলাৰীৰ বিৰুদ্ধে কোকৰাঝাৰ জিলা মুখ্য ন্যায়িক দণ্ডাধীশৰ আদালতত ভাৰতীয় দণ্ডবিধিৰ ১২০ (বি) আৰু ৫০০ নং ধাৰাৰ অধীনত ৩৪/২০২০ নম্বৰৰ গোচৰ তৰে৷ এই গোচৰটোত হাগ্রামা মহিলাৰীৰ উপৰি আন ১০জনকো সাঙোৰা হৈছিল৷ গোচৰটোৰ পৰিপ্রেক্ষিততে আজি হাগ্রামা মহিলাৰীয়ে সোঁ–শৰীৰে আদালতত উপস্থিত হৈ জামিন ল’বলগীয়া হয়৷