এই নিৰ্বাচন মাজুলীবাসীৰ স্বাভিমান আৰু মৰ্যাদাৰ নিৰ্বাচনঃ উজনি মাজুলীত ভুবন গামৰ হৈ নিৰ্বাচনী প্ৰচাৰ ৰাজ্য়িক বিজেপিৰ সভাপতি ভৱেশ কলিতাৰ

নিয়মীয়া বাৰ্তা, ২৭ ফেব্ৰুৱাৰীঃ মাজুলীত উপ-নিৰ্বাচনৰ দিন চমু চাপি অহাৰ লগে লগে বিভিন্ন ৰাজনৈতিক দলসমূহে প্ৰচাৰ অভিযান তুংগত কৰি তুলিছে৷ বিৰোধী ৰাজনৈতিক দলসমূহৰ সমান্তৰালকৈ শাসকীয় পক্ষয়ো মিত্ৰজোঁটৰ প্ৰাৰ্থী ভুৱন গামৰ হৈ ব্যাপক প্ৰচাৰ চলোৱা পৰিলক্ষিত হৈছে৷ আজি উজনি মাজুলীৰ নতুন বজাৰস্থিত মিলন সংঘত ভুৱন গামৰ হৈ নিৰ্বাচনী প্ৰচাৰ চলায় বিজেপিৰ ৰাজ্যিক সভাপতি ভৱেশ কলিতাই৷ প্ৰাৰ্থীগৰাকীৰ হৈ নিৰ্বাচনী ভাষণত সভাপতি গৰাকীয়ে কয় যে ‘এই নিৰ্বাচন হৈছে মাজুলীবাসীৰ স্বাভিমান আৰু মৰ্যদাৰ নিৰ্বাচন৷ মাজুলীবাসীৰ স্বাভিমান, মাজুলীৰ উন্নয়ন আৰু মাজুলীক গৌৰৱান্বিত কৰাৰ বাবে বিজেপি মিত্ৰজোঁট নেতৃত্বৰ চৰকাৰখন সদায় দৃঢ়প্ৰতিজ্ঞ৷ ২০১৬ চনৰ পিছত মাজুলীত উন্নয়নৰ যাত্ৰা আৰম্ভ হৈছিল আৰু তাৰ পিছতে মাজুলী সমষ্টিৰ আন্তঃগাঁথনি, শিক্ষা, স্বাস্থ্য আৰু যোগাযোগৰ ক্ষেত্ৰত বহু উন্নয়ন হৈছে৷ প্ৰাক্তন মুখ্যমন্ত্ৰী সৰ্বানন্দ সোণোৱালে ৰাজ্যসভালৈ নিৰ্বাচিত হৈ কেন্দ্ৰীয় মন্ত্ৰী হিচাপে দায়িত্ব পোৱাৰ পিছতে মাজুলীত খালী হৈ থকা বিধায়ক পদৰ বাবে ৭ মাৰ্চত অনুষ্ঠিত হ’ব লগা উপ-নিৰ্বাচনত আমি ভাৰতীয় জনতা পাৰ্টীৰ ফালৰ পৰা ভুৱন গামক প্ৰাৰ্থীত্ব প্ৰদান কৰিছো৷ মাজুলীৰ সৰ্বাংগীণ উন্নয়নৰ যাত্ৰা অটুট ৰখাৰ বাবে এশ শতাংশ বিজেপি মিত্ৰজোঁটৰ প্ৰাৰ্থী ভুৱন গামক ভোট প্ৰদান কৰিবলৈ তেওঁ সকলোকে আহ্বান জনায়৷ অন্যহাতে ভাষণ প্ৰসংগত সভাপতিগৰাকীয়ে কয় যে মুখ্যমন্ত্ৰী ড০ হিমন্ত বিশ্ব শৰ্মাৰ নেতৃত্বত সমগ্ৰ অসমতে এক উন্নয়নৰ প্ৰভাৱ পৰিছে৷ কনকলতা মহিলা সৱলীকৰণ আঁচনিৰ অধীনত মহিলাসকলক পঞ্চাশ হাজাৰকৈ টকা দিছো, অৰুণোদয় আঁচনি দিছো আৰু পুনৰ মাজুলীত নতুনকৈ পাঁচ হাজাৰ মহিলাই অৰুণোদয় আঁচনি পাবলৈ সক্ষম হ’ব – এয়াই আমাৰ ভাৰতীয় জনতা পাৰ্টীৰ চৰকাৰ৷ এই চৰকাৰখন হৈছে এক বিৰামহীন প্ৰগতিৰ যাত্ৰা আৰু অসমীয়া জাতিক জীয়াই ৰখাৰ চৰকাৰ৷ দেশ আজি প্ৰগতিৰ পথত৷ নৰেন্দ্ৰ মোডীৰ সবকা সাথ, সবকা বিকাশ, সবকা বিশ্বাস, সবকা প্ৰয়াস ঠিক তেনেদৰে হিমন্ত বিশ্ব শৰ্মাৰ নেতৃত্বতো আজি সমগ্ৰ অসমতে এক উন্নয়নৰ লহৰ বলিছে৷ দিনৰ ১১ বজাৰ পৰা অনুষ্ঠিত নিৰ্বাচনী প্ৰচাৰ সভাখনিত উপস্থিত থাকে সহঃ প্ৰভাৰী প্ৰৱন শৰ্মা, জোনাইৰ বিধায়ক ভুৱন পেগু, মাজুলী জিলা বিজেপিৰ সভাপতি লোকনাথ কুটুমকে আদি কৰি মিত্ৰজোঁটৰ ভালেসংখ্যক নেতা-কৰ্মী৷

বিজেপিত যোগদানঃ আজি নতুন বজাৰস্থিত উজনি মাজুলী মিলন সংঘত অনুষ্ঠিত হোৱা বিজেপি নিৰ্বাচনী প্ৰচাৰ সভাত দলটোৰ নীতি-আদৰ্শৰ প্ৰতি আকৃষ্ট হৈ বিজেপি ৰাজ্যিক সভাপতি ভৱেশ কলিতাৰ উপস্থিতিত গুনকান্ত বৈৰাগী, মনোজ পেগু, প্ৰবীন শইকীয়া আৰু ৰমেন্দ্ৰ পেগুৱে আনুষ্ঠানিকভাৱে বিজেপিত যোগদান কৰে৷

প্ৰেৰক ৰূপজ্যোতি বৰা