বিশেষ বাৰ্তা, ২মাৰ্চঃ আমি সকলোৱে কেতিয়াবা হ’লেও যান-জঁটত পৰো। তেতিয়াই মানুহে যিকোনো দিশেৰে নিজৰ বাহনখন উলিয়াই নিয়াৰ চেষ্টা কৰে। ইয়াৰ মাজতে আকৌ একাংশই অনৰ্গল হৰ্ণ বজায়। বহুতে ছিগনেল ভাঙি ওলাই যোৱাৰ দৰে কামো কৰে। ইয়াৰ ওলোটা ছবি এখনে এতিয়া সমগ্ৰ বিশ্বতে চৰ্চাৰ সৃষ্টি কৰিছে। ছবিখন আমাৰ নিচেই কাষৰ ৰাজ্য এখনৰে। যান-জঁটতো কোনো বেমেজালিৰ সৃষ্টি নকৰি সুন্দৰকৈ নিজৰ দিশতে আগুৱাই গৈ থকা বাহনবোৰ,মাজত কোনো ডিভাইডাৰ নাই,সেইটো লেন সম্পূৰ্ণ খালী,তাৰ পাছতো কোনেও নিয়ম ভংগ কৰা নাই…দেখিলেই ভাল লগা ছবিখন আমাৰে চুবুৰীয়া মিজোৰামৰ। এই ছবিখন শেহতীয়াকৈ ৰিটুইট কৰিছে মহিন্দ্ৰা গ্ৰুপৰ অধ্যক্ষ আনন্দ মহিন্দ্ৰাই। ছবিখন দেখি প্ৰখ্যাত উদ্যোগপতিজনেও শ্বেয়াৰ নকৰি ৰৈ থাকিব নোৱাৰিলে। ছবিখনে সঁচাকৈয়ে এটা বাৰ্তা বহন কৰিছে।