বিশেষ বাৰ্তা, ২৩ মাৰ্চঃ মৰিয়নি মহাবিদ্যালয়ৰ অসমীয়া আৰু ইংৰাজী বিভাগৰ যুটীয়া উদ্যোগত আৰু সাহিত্য মঞ্চৰ সহযোগত আজি ‘বিশ্ব কবিতা দিৱস’ উদযাপন কৰা হয় । এই উপলক্ষ্যে মহাবিদ্যালয়ৰ সোণালী জয়ন্তী ভৱনত সাহিত্য মঞ্চৰ সভানেত্ৰী, জ্যেষ্ঠা অধ্যাপিকা ড° বাণী বৰাৰ সঞ্চালনাত এক গাম্ভীৰ্যপূৰ্ণ অনুষ্ঠান অনুষ্ঠিত হয় । সাহিত্য মঞ্চৰ সদস্যা, শিক্ষা বিভাগৰ জ্যেষ্ঠা অধ্যাপিকা মিনতি বৰঠাকুৰে হীৰেন ভট্টাচাৰ্য্যৰ ‘নীল নক্ষত্ৰ’ কবিতা পাঠেৰে উপস্থিত সকলোকে আপ্লুত কৰে । অনুষ্ঠানটোত মহাবিদ্যালয়ৰ অসমীয়া বিভাগৰ জ্যেষ্ঠা অধ্যাপিকা ড° মানৱী গগৈয়ে মই, মোৰ সত্তা আৰু বুকুৰ কাঁইটডাল, অৰ্চনা শইকীয়াই ন- ব’হাগৰ আগমন, ববিতা ফুকনে ফাগুন আৰু ভেলেন্টাইন, অৰূপাঞ্জলি বৰাই লাইফ, মনালিছা বৰঠাকুৰে দেৱাল, শিল, আলহী , পল্লৱী কলিতাই চেনাই, আকাশৰ বিশালতা শীৰ্ষক স্বৰচিত কবিতা পাঠ কৰে । একেটা অনুষ্ঠানতে অধ্যাপিকা হৈনিকেপ হাউলাই কিং ডেভিদৰ ‘Book of Psalms-139’, উদেষ্ণা টায়ে কমলা দাসৰ ‘Introduction’, ৰূপালী মালাকাৰে বিশ্বকবি ৰবীন্দ্ৰনাথ ঠাকুৰৰ ‘হঠাৎ দেখা’, ডেভিদ হাফলংবাৰে জন ড’নীৰ ‘song’ কবিতা আবৃত্তি কৰে । উদেষ্ণা টায়ে শলাগৰ শৰাই আগবঢ়োৱা অনুষ্ঠানটোত সঞ্চালিকা ড° বাণী বৰাই ‘বিশ্ব কবিতা দিৱস’ৰ তাৎপৰ্য ব্যাখ্যা কৰি মানসিক উৎকৰ্ষ সাধনৰ বাবে কবিতাৰ দৰে সৃষ্টিশীল সাহিত্যৰ চৰ্চা অব্যাহত ৰখাৰ বাবে সকলোৰে প্ৰতি আহ্বান জনায় ।
প্ৰেৰক দিব্যজ্যোতি শইকীয়া