বিশেষ বাৰ্তা, ৫ এপ্ৰিলঃ মঙলবাৰে এগৰাকী নিৰ্দলীয় সহ কংগ্রেছী ৱাৰ্ড সদস্যই পিন্ধিলে গেৰুৱা বসন। বিজেপিৰ জিলা কাৰ্যালয়ত বিধায়ক মানৱ ডেকা, দলৰ জিলা সভাপতি ফণীধৰ বৰুৱাৰ উপস্থিতিত বিজেপিত যোগদান কৰে ১৪ নম্বৰ( ডি) ৱাৰ্ড ৰ কংগ্রেছী ৱাৰ্ড সদস্য হীনা ৰহমান আৰু ২ নম্বৰ( বি) ৱাৰ্ড ৰ নিৰ্দলীয় সদস্য কৃষ্ণা দাস শইকীয়াই। লগতে প্ৰায় ৫০ জন কংগ্রেছী তথা অন্য দলৰ কৰ্মীয়েও বিজেপিত যোগদান কৰে। উল্লেখ্য ২১ টা ৱাৰ্ডেৰে গঠিত লখিমপুৰ পৌৰ সভাৰ ১৪টা ৱাৰ্ড দখল কৰি বিজেপি দলে নিৰংকুশ সংখ্যা গৰিষ্ঠতা লাভ কৰিছিল। লগত আছিল মিত্র দল অগপৰ এজন ৱাৰ্ড সদস্য। সম্প্ৰতি বিজেপিৰ ৱাৰ্ড সদস্যৰ সংখ্যা মিত্র দল সহ ১৭জনলৈ বৃদ্ধি পালে। বুধবাৰে পৌৰসভাখনে শপত গ্রহণ কৰাৰ প্ৰাকমুহূর্তত শাসকীয় দলৰ শক্তি বৃদ্ধি হোৱাটোৱে ব্যাপক চৰ্চা লাভ কৰিছে। অচিৰেই আৰু কেইবাজনো অন্য দলৰ ৱাৰ্ড সদস্যই বিজেপিত যোগদান কৰিব বুলি বিধায়ক মানৱ ডেকাই যোগদান অনুষ্ঠানত সদৰী কৰে। যোগদানৰ কাৰ্য্যসূচী উপলক্ষে জিলা বিজেপিৰ কাৰ্যালয় নৃত্য-গীতেৰে মুখৰ হৈ পৰে।
প্ৰেৰক জীৱন গোস্বামী