ভাৰতীয় গণনাট্য সংঘৰ সংগঠক প্ৰয়াত পুষ্পজ্যোতি মহন্তৰ স্মৃতিচাৰণ অনুষ্ঠানত স্মাৰক গ্ৰন্থ উন্মোচন
বার্তা বুৰো, ৩ জুনঃ ভাৰতীয় গণনাট্য সংঘৰ বিশিষ্ট সংগঠক, সৰবৰহী সমাজকৰ্মী তথা মৰিগাঁও মহাবিদ্যালয়ৰ ৰসায়ন বিভাগৰ মুৰব্বী অধ্যাপক প্ৰয়াত পুষ্পজ্যোতি মহন্তক তেওঁৰ প্ৰথম বাৰ্ষিক মৃত্যুতিথিত সোঁৱৰণ কৰে মৰিগাঁও জিলাৰ বিভিন্ন দল-সংগঠন, শৈক্ষিক-সামাজিক অনুষ্ঠান-প্ৰতিষ্ঠানে। এই উপলক্ষে প্ৰয়াত পুষ্পজ্যোতি মহন্তৰ মৰিগাঁও চহৰস্থিত বাকৰিগাঁৱৰ নিজা বাসভৱনত অনুষ্ঠিত স্মৃতিচাৰণ সভাত মৰিগাঁও জিলা সাহিত্য সভা, মৰিগাঁও জিলা সাংবাদিক সংস্থা, মৰিগাঁও মহাবিদ্যালয়, ভাৰতীয় গণনাট্য সংঘৰ মৰিগাঁও জিলা শাখা,চেজ পানিনী পাব্লিক স্কুলকে বহু অনুষ্ঠান প্ৰতিষ্ঠানৰ বিষয়ববীয়াই অংশগ্ৰহণ কৰে। উক্ত স্মৃতিচাৰণ সভাতে প্ৰয়াত পুষ্পজ্যোতি মহন্তৰ বৰ্ণময় জীৱনগাথাক আলোকপাত কৰি প্ৰকাশ কৰি উলিওৱা স্মাৰক গ্ৰন্থ পুষ্পজ্যোতি উন্মোচন কৰে বিশিষ্ট কথা সাহিত্যিক , মৰিগাঁও মহাবিদ্যালয়ৰ প্ৰাক্তন অধ্যক্ষ নৰেন্দ্ৰ নাথ কেওটে। মৰিগাঁও মহাবিদ্যালয়ৰ সহযোগী অধ্যাপক পৰাগজ্যোতি মহন্তই আঁত ধৰা সভাখনত বিশিষ্ট সাহিত্যিক গবেষক মনেশ্বৰ দেউৰী, মৰিগাঁও জিলা সাহিত্য সভাৰ সভাপতি প্ৰতাপ হাজৰিকা,মৰিগাঁও মহাবিদ্যালয়ৰ অধ্যক্ষ ডঃ লীলাকান্ত বৰঠাকুৰ, মৰিগাঁও জিলা সাহিত্য সভাৰ সভাপতি প্ৰতাপ হাজৰিকা, নগাঁও জিলা সাহিত্য সভাৰ উপসভাপতি থগিত মহন্ত চিপিআইৰ ৰাজ্যিক সদস্য ৰাতুল বৰা, অসম সাহিত্য সভাৰ কেন্দ্ৰীয় সদস্য মহেন্দ্ৰ শইকীয়া, জেষ্ঠ সাংবাদিক ডালিম ফুকন, মৰিগাঁও মহাবিদ্যালয়ৰ ৰসায়ন বিভাগৰ মুৰব্বী অধ্যাপিকা ডঃ অৰুনিমা শৰ্মা, চেজ পানিনী পাব্লিক স্কুলৰ সভাপতি নিৰোদ বৰা বিশিষ্ট আদিয়ে অংশগ্ৰহণ কৰে।
প্ৰেৰক প্ৰাঞ্জল দাস