নিয়মীয়া বাৰ্তা, ১৩ জুনঃ সদ্যঘোষিত হাইস্কুল শিক্ষান্ত পৰীক্ষাত সুখ্যাতিৰে উত্তীৰ্ণ হোৱা ডিমৌৰ মেধাৱী ছাত্ৰ ক্ষীৰোদ বৰাৰ উচ্চ শিক্ষাৰ লাভৰ ক্ষেত্ৰত সহযোগ আগবঢ়াইছে দুলীয়াজানৰ মেধা ফাউণ্ডেচনকে ধৰি সুকল্প ফাউণ্ডেচন, পিপ’ল ফ’ৰ পিপ’ল, প্ৰগতিশীল যুৱ সমাজ (The Developing Youth), দুলীয়াজান ৰ’ট্ৰেক ক্লাব আৰু আচুৰ্য বৰপাত্ৰ ফেন ক্লাৱৰ লগতে ধেমাজি অভিযান্ত্ৰিক মহাবিদ্যালয়ে । আৰ্থিক অনাটনে দেখা দিয়া ছাত্ৰ গৰাকীৰ উচ্চ শিক্ষাৰ বাবে কোনো ধৰণৰ বাধা নহাকৈ আনুষংগিক অভাৱসমূহ পূৰণৰ পৰিপূৰক সামগ্ৰী চকী-টেবুল, কিতাপ, বহী, কলম আৰু কিছু আৰ্থিক সাহায্য প্ৰদান কৰা লগতে শুভেচ্ছা জ্ঞাপন কৰে ছাত্ৰ গোট সমূহে। উল্লেখযোগ্য যে ডিমৌৰ ৰাইচাই বাগানৰ সমীপৰ মেধাৱী ছাত্ৰজেন ডিমৌ টাউন হাইস্কুলৰ পৰা এইবেলি হাইস্কুল শিক্ষান্ত পৰীক্ষা উত্তীৰ্ণ হৈছে। ছাত্ৰজনৰ জৰাজীৰ্ণ বাসগৃহটোও ছাত্ৰ গোটসমূহে মেৰামতি কৰি দিয়াৰ প্ৰতিশ্ৰুতি দিছে। দুলীয়াজানৰ ছাত্ৰ গোটকেইটাৰ এই মহানুভৱতাৰ লগতে যাতায়তৰ ক্ষেত্ৰত সুবিধা আগবঢ়াই অইল ইণ্ডিয়া লিমিটেডে।
প্ৰেৰক কৃষ্ণা গগৈ