নিয়মীয়া বাৰ্তা,২৪জুলাইঃ বিগত বৰ্ষত এমাহৰ অন্তৰতে অহা দুটাকৈ আৱতৰীয়া বানপানীয়ে আন আন জিলাৰ লগতে নগাওঁ জিলাতো এক বিস্তৰ ক্ষতি কৰিলে । ফলত জিলাখনত প্রায় ১৯,৮০০ হেক্টৰ খেতিবাৰি বানত নষ্ট হৈছে । কিছু পৰিমানে হলেও কৃষক ৰাইজক সকাহ দিবৰ বাবে অসম কৃষি বিভাগে শালিধানৰ কঠিয়াতলীৰ ব্যৱস্থা কৰিছে ৷ ইয়াৰ সমান্তৰালভাৱে নগাঁও জিলাতো ৯০ হেক্টৰ মাটিত জিলাখনৰ ১৮ টা স্থানত বাহাদুৰ চাব-১ আৰু বীনা ধান -১০ নামৰ দুটা উচ্চ উৎপাদনক্ষম জাতৰ শালিধানৰ সমূহীয়া কঠিয়াতলীক ধান সিচা সম্পূর্ণ কৰা হৈছে । আজি এই কঠিয়াতলীৰ পৰা উৎপাদন হোবা শালিধানৰ কঠিয়া বিতৰণৰ শুভাৰাম্ভ কৰে নগাঁও সদৰ সমষ্টিৰ বিধায়ক ৰূপক শৰ্মাই ৷ এই উদ্দেশ্যে আজি নগাওঁ সমষ্টিৰ অন্তর্গত ডাকৰঘাট গাওঁৰ কৃষকৰ মাজত বাহাদুৰ চাব-১ ধানৰ কঠিয়া বিতৰণ কৰা হয় । কৃষক সকলৰ মাজত কঠিয়া বিতৰণ কৰি বিধায়ক শৰ্মাই তেখেতৰ ভাষণত কয় সমূহ কৃষক ৰাইজক ন-উদ্যমেৰে পুনৰ কৃষি কাৰ্য্যত মনোনিৱেশ কৰিবৰ বাবে আহ্বান জনায় । অনুষ্ঠানত উপস্থিত থকা জিলা কৃষি বিষয় তৰুণ হাজৰিকাই জানিবলৈ দি কয় জিলাখনৰ ৰহা,কামপুৰ আদি অঞ্চলৰ কৃষক সকলৰ মাজতো পর্যায়ক্রমে এই বিনামূলীয়া কঠিয়া বিতৰণৰ ব্যবস্থা কৰা হব ৷ এই কার্য্যসূচীত উপস্থিত থাকে মহকুমা কৃষি বিষয়া ৰঞ্জন প্রসাদ ডেকা , এপাৰ্টৰ জিলা উদ্যানশস্য সমন্বয়ক পংকজ হাজৰিকা আৰু ডাকৰঘাট প্রগতিশীল কৃষক পলাশ প্রকাশ শইকীয়াকে আদি কৰি প্রায় ৫০ গৰাকী উদ্যমী কৃষক উপস্থিত থাকে ৷