বিশেষ বাৰ্তা, ১ নৱেম্বৰ: আজিৰে পৰা নাহৰকটীয়া ক্ৰীড়া সন্থাৰ খেলপথাৰত শুভাৰম্ভ হৈছে প্ৰথম বাৰ্ষিক দিবা নৈশ আমন্ত্ৰণ মূলক আন্তঃবিভাগ বিধায়ক কাপ ক্ৰিকেট প্ৰতিযোগিতা। নাহৰকটীয়া বিধায়ক একাদশ, নাহৰকটীয়া সাংবাদিক একাদশ, নাহৰকটীয়া ৰাজহ চক্ৰ বিষয়া একাদশ, নাহৰকটীয়া ক্ৰীড়া সন্থা, জয়পুৰ উন্নয়ন খণ্ড একাদশ, স্বাস্থ্য বিভাগ একাদশ, নাহৰকটীয়া শিক্ষা বিভাগ একাদশ, নাহৰকটীয়া বেডমিণ্টন একাদশ, নাহৰকটীয়া থানা একাদশ, নাহৰকটীয়া পৌৰ সভা একাদশ একাদশ, জয়পুৰ থানা একাদশ, নামৰূপ থানা একাদশ, নামৰূপ থানা একাদশ, নামৰূপ পৌৰ সভা একাদশ, বিভি এফ চি এল একাদশ, নামৰূপ এ পি এল একাদশ আৰু নামৰূপ এ পি জি চি এল একাদশকে ধৰি মুঠ ১৬ টা দলে অংশগ্ৰহণ কৰা প্ৰতিযোগিতাখনৰ উদ্বোধনী খেলখনত অংশগ্ৰহণ কৰে বিধায়ক একাদশ আৰু নাহৰকটীয়া ক্ৰীড়া সন্থা একাদশে। নাহৰকটীয়া মহাবিদ্যালয়ৰ অধ্যক্ষ ডঃ জ্যোতিপ্ৰসাদ কোঁৱৰ, নাহৰকটীয়াৰ ৰাজহ চক্ৰ বিষয়া শৰৎ কুমাৰ গগৈ, জয়পুৰ খণ্ড উন্নয়ন বিষয়া ৰঞ্জিত কুমাৰ বুঢ়াগোহাঁই বিভিএফচিএলৰ পৰিচালন সঞ্চালক শিৱপ্ৰসাদ মহান্তি টিংখং ৰাজহ চক্ৰৰ চক্ৰ বিষয়া কৌস্তভ কলিতা নাহৰকটীয়া থানাৰ ভাৰপ্ৰাপ্ত বিষয়া প্ৰাঞ্জল চেতিয়া জয়পুৰ থানাৰ ভাৰপ্ৰাপ্ত বিষয়া অজিত কুমাৰ ৰয় আৰু নামৰূপ থানাৰ ভাৰপ্ৰাপ্ত বিষয়া নীলকমল বৰুৱা নাহৰকটীয়া প্ৰেছ গীল্ডৰ সভাপতি প্ৰাঞ্জল ভূঞা, নাহৰকটীয়া পৌৰ সভাৰ পৌৰপতি পম্পী সাহা, নামৰূপ পৌৰসভাৰ পৌৰপতি প্ৰশান্ত গগৈকে আদি কৰি কেইবাগৰাকীও বিশিষ্ট ব্যক্তি উপস্থিত থকা উদ্বোধনী অনুষ্ঠানটোত নাহৰকটীয়াৰ বিধায়ক তৰংগ গগৈয়ে আদৰণি বক্তব্য আগবঢ়োৱাৰ পিছতে সুকণ্ঠী গায়িকা জয়শ্ৰী বুঢ়াগোহাঁইয়ে গীত পৰিবেশনেৰে পৰিৱেশটো জীপাল কৰি তোলাৰ লগতে নাহৰকটীয়া মহাবিদ্যালয়ৰ অধ্যক্ষ ডঃ জ্যোতিপ্ৰসাদ কোঁৱৰে বক্তব্য আগবঢ়ায়। উল্লেখযোগ্য যে উদ্বোধনী খেলখনত নাহৰকটীয়া ক্ৰীড়া সন্থাই টছত জিকি বিধায়ক একাদশক বেটিংলৈ আমন্ত্ৰণ জনোৱাৰ পিছত বিশ্বজিত চাৰিঙিয়া ফুকনৰ ২৪ ৰাণৰ সহায়ত নিৰ্ধাৰিত ১০ অভাৰত ৭ টা উইকেট হেৰুৱাই ৬৫ ৰাণ সংগ্ৰহ কৰে। প্ৰত্যুত্তৰত অপেনাৰ উৎপল ডেকাৰ ৩৪ আৰু চিন্তামণি কোঁৱৰৰ ৩০ ৰাণৰ বিনিময়ত মাত্ৰ ৭ অভাৰতে এটাও উইকেট নেহেৰুৱাকৈ বিজয় লক্ষ্যত উপনীত হয়।
প্ৰেৰক প্ৰাঞ্জল ভূঞা