নিয়মীয়া বাৰ্তা, ৩ মে’: বিশিষ্ট চলচ্চিত্রকাৰ মণিৰত্নমৰ মাষ্টাৰপিচ পনিয়িন ছেলভান–২ বা পিএছ–২ৱে বিশ্বজুৰি বক্স অফিচত সৃষ্টি কৰিছে আলোড়ন৷ ইতিমধ্যে এই ছবিখনে বিশ্বৰ বিভিন্ন দেশত ২০০ কোটিতকৈ অধিক টকা উপার্জন কৰিবলৈ সক্ষম হৈছে৷ ঐশ্বর্য ৰায় বচ্চন, চিয়ান বিক্রম, কার্তি, তৃষা কৃষ্ণান আৰু সবিতা ধূলিপালা অভিনীত এই ছবিখন কল্কি কৃষ্ণমূর্তিৰ ১৯৫৫ চনৰ বিখ্যাত গ্রন্থ পনিয়িন ছেলভানৰ কাহিনীক আধাৰ হিচাপে লৈ নির্মাণ কৰা হৈছে৷ সুবাচকৰণৰ লাইকা প্রডাকচনে প্রযোজনা কৰা মণিৰত্নম পৰিচালিত এই তামিল ছবিখন ৪ ডি এক্সত মুক্তি লাভ কৰিছে৷ আইমেক্সতো ছবিখন উপলব্ধ৷ চোলা বংশৰ সম্রাট সুন্দৰ চোঝাৰ আৰু তেওঁৰ পুত্র আদিত্য কাৰিকালান তথা পনিয়িন ছেলভানৰ কাহিনীক লৈ নির্মাণ কৰা হৈছে এই ছবিখন৷