নিয়মীয়া বাৰ্তা, ১৩ ফেব্ৰুৱাৰীঃ চীনৰ হুবেই প্রদেশৰ য়ুহান চহৰৰ পৰা বিশ্বৰ বিভিন্ন দেশলৈ বিস্তাৰ ঘটা ক’ৰোনা ভাইৰাছৰ সংক্রমণত প্রাণ হেৰুওৱা লোকৰ সংখ্যা ১১১৪গৰাকীলৈ বৃদ্ধি পাইছে৷ কালি মাজনিশালৈকে এই তথ্য সদৰী কৰিছে বেইজিং প্রশাসনে৷ কালিৰ দিনটোত ৯০গৰাকীতকৈ অধিক লোকে প্রাণ হেৰুৱাইছে চীনত৷ ইফালে ক’ৰোনাত আক্রান্ত হৈ চিকিৎসা গ্রহণ কৰা লোকৰ সংখ্যা ৪৪,৭৪২গৰাকীলৈ বৃদ্ধি পাইছে৷ জেনেভাত মুখ্য কার্যালয় থকা বিশ্ব স্বাস্থ্য সংস্থা (হু)ই এই ক’ৰোনা ভাইৰাছৰ নতুন নাম দিছে ‘ক’ভিড–১৯’৷ মানুহৰ পৰা মানুহলৈ সংক্রমিত হোৱা এই ভাইৰাছবিধক ঘাতক বুলিও অভিহিত কৰিছে বিশ্ব স্বাস্থ্য সংস্থাই৷ অৱশ্যে ক’ৰোনাৰ এই নতুন নামকৰণ সন্দর্ভত সবিশেষ তথ্য সদৰী কৰা নাই সংস্থাটোৱে৷