নিয়মীয়া বাৰ্তা, ২১ আগষ্টঃ কালি ভাৰত বিকাশ পৰিষদ, ধুবুৰী শাখাৰ উদ্যোগত ধুবুৰীত ২১সংখ্যক জিলা ভিত্তিক কুইজ প্ৰতিযোগিতা এখন অনুষ্ঠিত হৈ যায়। ধুবুৰীৰ টাউন হোটেল প্ৰেক্ষাগৃহত অনুষ্ঠিত সেই প্ৰতিযোগিতাখন সঞ্চালনা কৰে গুৱাহাটীৰ পৰা অহা অসমৰ বিশিষ্ট কুইজ মাষ্টাৰ ধৰ্মৰাজ যোশী আৰু তেওঁৰ সহযোগী নাৰায়ণ চন্দ্ৰ শীলে। ষষ্ঠ শ্ৰেণীৰ পৰা অষ্টম শ্ৰেণীলৈকে কনিষ্ঠ বিভাগ আৰু অষ্টম শ্ৰেণীৰ পৰা দ্বাদশ শ্ৰেণীলৈ জ্যেষ্ঠ বিভাগ- এই দুটা শাখাৰ এই কুইজ প্ৰতিযোগিতাখনত ৩৩টা দলৰ মুঠ ৬৬ ছাত্ৰ-ছাত্ৰীয়ে অংশগ্ৰহণ কৰে। মৰ্যাদাপূৰ্ণ এই প্ৰতিযোগিতাখনৰ কনিষ্ঠ শাখাত ধুবুৰীৰ এছ পি ইংৰাজী মাধ্যম হাইস্কুলৰ ষষ্ঠ শ্ৰেণীৰ ছাত্ৰ কিংশুক চৌধুৰী আৰু আৰিফ মাহমুদ হ’কৰ দলটোৱে প্ৰথম স্থান লাভ কৰে। আনহাতে এছ পি ইংৰাজী মাধ্যম হাইস্কুলৰেই নৱম শ্ৰেণীৰ ছাত্ৰ সৌমল্য পাল আৰু নিয়াজ ৰাব্বিৰ দলটোৱে জেষ্ঠ শাখাত প্ৰথম স্থান বুটলিবলৈ সক্ষম হয়। প্ৰথম স্থান লাভ কৰা এই দল দুটাই অহা ৫ নৱেম্বৰত গুৱাহাটীত অনুষ্ঠিত হ’বলগীয়া ৰাজ্যিক পৰ্যায়ৰ কুইজ প্ৰতিযোগিতাত অংশগ্ৰহণ কৰিব বুলি ভাৰত বিকাশ পৰিষদৰ ধুবুৰী শাখাৰ সম্পাদক বিজয় কুৰ্মিয়ে অৱগত কৰিছে।
প্ৰেৰক অমিতাভ চক্ৰৱৰ্তী