নিয়মীয়া বাৰ্তা, ৩০ আগষ্ট : ৰাখী বন্ধন উৎসৱ উপলক্ষে আজি সীমান্ত চেতনা মঞ্চ পূৰ্বোত্তৰৰ ধুবুৰী নগৰ কমিটীৰ উদ্যোগত আয়োজিত হয় বিশেষ কাৰ্যসূচী। সেই কাৰ্য্যসূচীৰ অংশ ৰূপে সংগঠনটোৱে সীমান্ত সুৰক্ষা বাহিনী (বিএছএফ)ৰ ধুবুৰীস্থ জলস্কন্ধ কাৰ্যালয়ত আয়োজিত অনুষ্ঠানত এক উখল-মাখল পৰিৱেশৰ সৃষ্টি হয়। সীমান্ত চেতনা মঞ্চৰ কাৰ্য্যকৰ্তাসকলে দেশৰ বিভিন্ন প্ৰান্তৰ পৰা কৰ্মসূত্ৰে ধুবুৰীলৈ অহা বিএছএফৰ বিষয়া আৰু জোৱানসকলক সম্পূৰ্ণ মাংগলিক অনুষ্ঠানেৰে ৰাখী পৰিধান কৰায়। তদুপৰি ধুবুৰী আৰক্ষী ছাউনীতো সীমান্ত চেতনা মঞ্চ পূৰ্বোত্তৰৰ ধুবুৰী নগৰ সমিতিৰ উদ্যোগত ৰাখী বন্ধন উপলক্ষে অনুষ্ঠিত হয় এক বিশেষ অনুষ্ঠান। ধুবুৰী জিলাৰ আৰক্ষী অধীক্ষক নবীন সিং উপস্থিত থকা উক্ত কাৰ্য্যসূচী ভাৰত মাতা পূজনেৰে আৰম্ভ হয়। এক উৎসৱমুখৰ পৰিৱেশৰ মাজত অনুষ্ঠিত হোৱা সেই কাৰ্যসূচীত আৰক্ষী অধীক্ষক সিংকে ধৰি উপস্থিত ধুবুৰী আৰক্ষীৰ অন্যান্য বিষয়া, জোৱানসকলক আনুষ্ঠানিকভাৱে ৰাখী পৰিধান কৰায়।
প্ৰেৰক অমিতাভ চক্ৰৱৰ্তী