বিশেষ বাৰ্তা, ৮ অক্টোবৰ : ডিব্ৰুগড় জিলা বিজেপিৰ নতুন সভাপতিৰূপে উজ্জ্বল কাশ্যপক নিযুক্তি প্ৰদান কৰা হৈছে। অসম ৰাজ্যিক বিজেপিৰ সভাপতি ভৱেশ কলিতাই এক নির্দেশনাযোগে উজ্জ্বল কাশ্যপক নিযুক্তি দিয়ে। ইফালে, আন এক নির্দেশযোগে ৰাজ্যিক বিজেপিৰ সভাপতিগৰাকীয়ে ডিব্ৰুগড় জিলা সভাপতি হিচাপে দুটাকৈ কাৰ্যকালৰ বাবে কাৰ্যনিবাহ কৰা জগদীশ ৰাজকোঁৱৰক দলৰ ৰাজ্যিক কাৰ্যনিৰ্বাহক সদস্যৰূপে নিযুক্তি প্ৰদান কৰে বুলি জানিব পৰা গৈছে। ভাজপা (যুৱ মৰ্চাৰ)ৰ বিভিন্ন স্তৰৰ দায়িত্বৰ পৰা দলীয় মূল সমিতিৰ বিভিন্ন দায়িত্বলৈকে নিষ্ঠাসহকাৰে পালন কৰা উজ্জ্বল কাশ্যপে ১৯৯৮ চনত বিজেপিত যোগদান কৰি যুৱ মৰ্চাৰ জিলা সাধাৰণ সম্পাদকৰ পদত ২০০৩ চনত অধিষ্ঠিত হৈ যুৱ মৰ্চাৰ ৰাজ্যিক সম্পাদকৰ আসন অলংকৃত কৰে ২০০৬ চনত। অমায়িক, স্বল্পভাষী উজ্জ্বল কাশ্যপে অনাগত দিনত দলৰ সমান্তৰালকৈ জিলাখনৰ উন্নয়ন আৰু প্ৰগতিৰ হকে কাম কৰি যাব বুলিও সকলোৱে আশা প্ৰকাশ কৰিছে। কাশ্যপে শেহতীয়াকৈ জয়পুৰ মণ্ডল বিজেপিৰ প্ৰভাৰী হিচাপেও দায়িত্বত আছে।
প্ৰেৰক বিভাস দুৱৰা