নিয়মীয়া বাৰ্তা, ১৯ ফেব্রুৱাৰীঃ গৃহযুদ্ধ বিধ্বস্ত ছিৰিয়াৰ পূর্বোত্তৰ ইডলিব প্রদেশৰ বিদ্রোহী নিয়ন্ত্রিত অঞ্চলত দেশখনৰ সেনাৰ অভিযান বৃদ্ধি পোৱাৰ লগে লগে ৰাষ্ট্রসংঘকে ধৰি বিভিন্ন দাতব্য সংস্থাৰ সাহায্য অভিযানলৈ আহি পৰিছে প্রত্যাহ্বান ৷ শেহতীয়াকৈ বিশ্বৰ সর্বোচ্চ সংস্থাটোৱে সদৰী কৰা অনুসৰি যোৱা ডিচেম্বৰ মাহৰ পৰা ইডলিবৰ পৰা ঘৰ এৰি পলায়ন কৰিবলৈ বাধ্য হৈছে ৯ লাখ লোকে ৷ এই লোকসকলৰ গৰিষ্ঠসংখ্যকেই হৈছে মহিলা আৰু শিশু ৷ ৰাষ্ট্রসংঘৰ শেহতীয়া প্রতিবেদন অনুসৰি চৰকাৰী বাহিনীৰ বোমাবর্ষণৰ ফলত ইডলিবত বহু স্বাস্থ্য কেন্দ্র আৰু শিক্ষা প্রতিষ্ঠান বিধ্বস্ত হৈছে ৷ অঞ্চলটোত ছিৰিয়াৰ ৰাষ্ট্রপতি বাছাৰ আল–আছাদে অভিযান তীব্রতৰ কৰাৰ সংকল্প লোৱাৰ পিছতে ৰাষ্ট্রসংঘই ভয়াৱহ মানৱীয় সংকট সৃষ্টি হ’ব বুলি সতর্কবাণী কৰিছিল ৷ শেহতীয়াকৈ ৰাষ্ট্রসংঘৰ এই সতর্কবাণীৰ সত্যতা প্রমাণিত হৈছে৷ চলিত মাহত এলেপ্প’ আৰু ইডলিবক সম্পূর্ণ মুক্ত কৰাৰ বাবে ছিৰিয়ান বাহিনীয়ে আক্রমণ বৃদ্ধি কৰিছে ৷ এই আক্রমণৰ ফলত আটাইতকৈ বেছি ক্ষতিৰ সন্মুখীন হৈছে অসামৰিক লোকসকল ৷ লক্ষণীয়ভাৱে দেশখনত শেহতীয়াকৈ ইডলিবেই বিদ্রোহীৰ শক্তিশালী হিচাপে চিহ্ণিত হৈছে ৷ গতিকে ইডলিবৰ পৰা বিদ্রোহী যোদ্ধাসকলক খেদি পঠিওৱাৰ সংকল্প লৈছে আছাদে ৷ এইক্ষেত্রত ৰাছিয়াই ছিৰিয়ান বাহিনীক সহযোগিতা আগবঢ়োৱাৰ লগে লগে মার্কিন ৰাষ্ট্রপতি ড’নাল্ড ট্রাম্পে মস্কো প্রশাসনক সংযত হ’বলৈ সকীয়নি দিছে ৷