বিশেষ বাৰ্তা, ২৪ অক্টোবৰ : শাৰদীয় দুৰ্গোৎসৱৰ আনন্দ-উল্লাহৰ মাজতে যোৰহাটত সংঘটিত হয় একাধিক বিক্ষিপ্ত ঘটনা। নৱমীৰ নিশা জনসমাগমৰ মাজতেই চাৰি-পাঁচজনীয়া উদণ্ড যুৱকৰ দলে এজন যুৱকক আৰক্ষীৰ সন্মুখতে প্ৰচণ্ড মাৰপিট কৰাৰ লগতে ছুৰীৰে হানি-খুঁচি হত্যাৰ চেষ্টা চলায় । পিছত সংকটজনক অৱস্থাত যুৱকজনক যোৰহাট মেডিকেল কলেজ হস্পিটেললৈ প্ৰেৰণ কৰা হয়। সম্প্ৰতি যোৰহাট মেডিকেল কলেজ হস্পিটেলৰ আই চি ইউত মৃতুৰে যুঁজি থকা যুৱকজনৰ নাম বাবু চৌধুৰী বুলি জানিব পৰা গৈছে। ঘটনাৰ বিৱৰণী মতে, বাবু চৌধুৰী নামৰ যুৱকজনে তিনিগৰাকী যুৱতীৰ সৈতে নগৰখনৰ গড়আলিৰ ভি মাৰ্টৰ সন্মুখত পূজা চাই থকাৰ অৱস্থাত চাৰি-পাঁচজনীয়া উদন্ড যুৱকৰ দলে যুৱতীকেইগৰাকীক অশালীন মন্তব্য কৰে। বাবু চৌধুৰী নামৰ যুৱকজনে যুৱককেইজনৰ অশোভনীয় আচৰণত ক্ষুব্ধ হৈ বিৰোধিতা কৰাত যুৱককেইজনে প্ৰথমে টনা-আঁজোৰা কৰে আৰু পিছত সমীপত থকা এখন তামোল-পাণৰ দোকানৰ কাষলৈ নি মাৰপিট কৰে। কেৱল ইমানেই নহয়, জনসমাগমৰ মাজতে বাবু চৌধুৰী নামৰ যুৱকজনক যুৱকৰ দলটোৰ এজন যুৱকে ধৰি লোৱাৰ পিছত আন এজন যুৱকে লগত লৈ অনা এখন ছুৰীয়ে উপৰ্যুপৰি আক্ৰমণ কৰি আহত কৰে। কিছু দূৰত্বত থকা আৰক্ষীয়ে কোনো তলকিবই নোৱাৰাকৈ ঘটনাটো সংঘটিত কৰি যুৱকৰ দলে পলায়ন কৰিবলৈ সক্ষম হয়। পিছত উক্ত স্থানত আৰক্ষীৰ লোকে উপস্থিত হৈ গুৰুতৰভাৱে আহত বাবু চৌধুৰীক ততাতৈয়াকৈ যোৰহাট মেডিকেল কলেজ হস্পিটেললৈ লৈ যোৱা হয়। এই ঘটনা সন্দৰ্ভত চি চি টি ভিৰ দৃশ্য নিৰীক্ষণ কৰি আৰক্ষীয়ে এজন যুৱকক আটক কৰিছে যদিও অন্য যুৱককেইজনক গ্ৰেপ্তাৰ কৰিবলৈ সক্ষম হোৱা নাই। আৰক্ষী আৰু জনসাধাৰণৰ সন্মুখতে হিন্দী চিনেমাৰ দৰে ৰাজপথত সংঘটিত হোৱা এই ঘটনাই প্ৰতিক্ৰিয়াৰ সৃষ্টি কৰিছে।
প্ৰেৰক ৰঞ্জিত ভূঞা