🔹 যুৱকক উত্তম-মধ্যম, পিষ্টল উদ্ধাৰ
বিশেষ বাৰ্তা, ১৮ ডিচেম্বৰ : চৰাইদেউ জিলাৰ সদৰ সোণাৰি আৰক্ষী থানাৰ অন্তৰ্গত টিয়ক ৰজাবাৰীত কালি সন্ধিয়া পিষ্টল দেখুৱাই ধনদাবী কৰা এজন যুৱকক ৰাইজে আটক কৰে। প্ৰাপ্ত তথ্য মতে, আটকাধীন যুৱকজন সোণাৰি ভজো ৰংছোৱাল চাংমাই গাঁৱৰ লক্ষ্য চেতিয়া। ধৃত যুৱক লক্ষ্যই যোৱা ১২ ডিচেম্বৰত অঞ্চলটোৰ ব্যৱসায়ী হেমন্ত মালীক নিজকে সংগঠনৰ ল’ৰা বুলি কৈ পাঁচ হাজাৰ টকা দাবী কৰিছিল। কালি সন্ধিয়া প্ৰায় ৭ বজাত পুনৰ যুৱকজনে নম্বৰবিহীন এখন স্কুটী লৈ দাবীকৃত ধন নিবলৈ আহি পিষ্টল প্ৰদৰ্শন কৰি দাবীকৃত ধন আদায় দিবলৈ ভীতি প্ৰদৰ্শন কৰে। পাছত ব্যৱসায়ীজনে চিঞৰ-বাখৰ কৰাত স্কুটী লৈ পলায়ন কৰিব বিচাৰোঁতে যুৱকজনক ৰাইজে আটক কৰি উত্তম-মধ্যম দি সোণাৰিৰ আৰক্ষীক গতাই দিয়ে। ইফালে, ধনদাবী কৰা যুৱক লক্ষ্যই পলায়ন কৰোঁতে পিষ্টলেটো হাবিত পেলাই দিছিল যদিও আৰক্ষীয়ে পিষ্টলটো উদ্ধাৰ কৰিবলৈ সক্ষম হৈছে।
প্ৰেৰক দীপাংকৰ পাল